TNAOT News

· 2020-04-18

កូវីដ១៩រាតត្បាត ធ្វើឲ្យពលរដ្ឋថៃ ជិត១លាននាក់អត់ការងារធ្វើ

#បុគ្គលិក# #COVID-19# #ថៃ# #សហគ្រាស# #អាជីវកម្ម# #រោងចក្រ# #សង្គម#

7310

ដោយសារតែកូវីដ១៩ រាតត្បាតខ្លាំងពេក នៅក្នុងប្រទេសថៃ ក៏ដូចជា នៅជុំវិញពិភពលោក ទើបធ្វើបណ្ដាក្រុមហ៊ុន និងរោងចក្រជាច្រើនត្រូវបិទទ្វារ ហើយបុគ្គលិក រាប់សែននាក់ នៅក្នុង​ប្រទេសនេះ ត្រូវអត់ការងារធ្វើ ។ នេះបើយោងតាម Thethaiger ។

យោងតាមនាយកដ្ឋានការពារការងារ និងសុខុមាលភាព​ នៃប្រទេសថៃ បានឲ្យដឹងថា ការរាត​ត្បាត នៃវីរុសកូវីដ១៩នេះ បានធ្វើឲ្យរោងចក្រ សហគ្រាស និងក្រុមហ៊ុនជាច្រើនត្រូវបិទទ្វារ។ បញ្ហានេះ បានធ្វើឲ្យបុគ្គលិក និងកម្មករ រាប់ម៉ឺននាក់ ត្រូវអត់ការងារធ្វើ។

ប្រភពព័ត៌មានដដែល បានបន្ដថា បើគិតចាប់តាំងពីអំឡុងខែធ្នូ ឆ្នាំ២០១៩ រហូតមកដល់ពាក់​កណ្ដាលខែមេសា​ ឆ្នាំ២០២០នេះ មានបុគ្គលិក និងនិយោជិត ចំនួន៧សែននាក់ បាន​អត់​ការងារ​​ធ្វើ ហើយត្រូវទទួលជំនួយផ្នែកហិរញ្ញវត្ថុពីរដ្ឋាភិបាលថៃ។

លោក Apinya Sujarittanan អគ្គនាយកដ្ឋានការពារការងារ និងសុខុមាលភាព (DLPW) បានថ្លែង កាលពីថ្ងៃទី១៧ ខែមេសា ឆ្នាំ២០២០ថា បេឡាសន្ដិសុខសង្គម ​បានធ្វើកំណត់ត្រា​អំពី​ចំនួនអ្នកអត់ការងារធ្វើ ហើយទទួលបានពីផលប្រយោជន៍នេះ មានរហូតដល់ទៅជាង​៧សែននាក់។ តួលេខ នៃចំនួនអ្នកអត់ការងារធ្វើដ៏ច្រើនបែបនេះ ក៏ដោយសារតែ​ក្រុមហ៊ុន​ព្យួរការងារ និងបញ្ឈប់ពីការងារ ព្រោះតែការរាតត្បាត នៃវីរុសនេះ។

ប្រភពព័ត៌មានដដែល បានបន្ដថា បើគិតពីខែតុលា ឆ្នាំ២០១៩ រហូតមកដល់ខែមីនា ឆ្នាំ​២០២០ មានការបិទអាជីវកម្ម សរុប ៩៩២ បើធៀបនឹងអំឡុងពេលដូចគ្នា កាលពី​ឆ្នាំ២០១៨ និង២០១៩ មានត្រឹមតែ៥១១ប៉ុណ្ណោះ។ ការបិទអាជីវកម្មខាងលើនេះ ធ្វើឲ្យ​បុគ្គលិក និងកម្មករ រហូតដល់ទៅ ២៧១ ៤៤៦នាក់ រងផលប៉ះពាល់ដោយផ្ទាល់ ហើយអ្នកទាំងនោះ​មិនបានដាក់​ពាក្យបណ្ដឹងទាមទារសំណងទៅកាន់អធិការកិច្ច នៃក្រសួងការងារនោះឡើយ។

ក្រុមហ៊ុនតូយ៉ូតាម៉ូតូថៃ ក៏បានប្រកាសថា ខ្លួននឹងពន្យារពេលផលិតកម្ម រហូតដល់ថ្ងៃទី៣០ ខែមេសា។ រីឯផលិតកម្មរបស់ក្រុមហ៊ុន ត្រូវបានផ្អាកដំណើរការ តាំងពីថ្ងៃទី៧ ខែមេសា មកម៉្លេះ ។ សកម្មភាពនេះ ត្រូវបានធ្វើឡើង ដោយសារការថយចុះ នៃការផលិតគ្រឿង​បន្លាស់រថយន្ត នៅជុំវិញពិភពលោក។

ទោះយ៉ាងណា ក្រុមហ៊ុនបានបញ្ជាក់ថា ការពន្យារពេលខ្សែសង្វាក់ផលិតកម្ម នឹងមិនប៉ះពាល់​ដល់​ប្រតិបត្តិការរ​បស់ក្រុមហ៊ុនចែកចាយតូយ៉ូតា ឬឡិចស៊ីសនោះឡើយ។

បើគិតត្រឹមរសៀល ថ្ងៃទី១៨ ខែមេសា​​ ឆ្នាំ២០២០ នៅក្នុងប្រទេសថៃ មានអ្នកឆ្លងកូវីដ១៩ កើនឡើង ២៧០០នាក់ ក្នុងនោះស្លាប់៤៧នាក់ និងជាសះស្បើយ១៦៨៩នាក់៕ ប្រែសម្រួលដោយ Nuon

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និង​គោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។

យោបល់ទាំងអស់ (0)

ការណែនាំពិសេស