យើងធ្លាប់តែលឺថាគេទៅចូលរួម Workshop ពីប្រធានបទផ្សេងៗ ហើយការពាក្យ workshop នេះក៏ត្រូវបានគេប្រើយ៉ាងទូលំទូលាយក្នុង គ្រប់មជ្ឈដ្ឋានទាំងស្ថាប័នរដ្ឋ និងស្ថាប័នឯកជន ប៉ុន្តែមិនមែនគ្រប់គ្នាយល់អត្ថន័យនៃពាក្យ Workshop នេះនោះទេ។​ ការពិតទៅ Workshop ជាភាសាខ្មែរ វាមានអត្ថន័យថាសិក្ខាសាលា។ សិក្ខាសាលាគឺជាប្រភេទ កម្មវិធីដែលផ្តោតលើប្រធានបទណាមួយដែលមានការធ្វើបទបង្ហាញដោយវាគ្មិនមានជំនាញ ឬក៏អ្នកឯកទេសលើប្រធានបទនោះផ្ទាល់ ហើយត្រូវបានរៀបចំដោយក្រុមការងារ ឬស្ថាប័នណាមួយ។ ជារឿយៗ សិក្ខាសាលាធ្វើឡើង មានរយៈពេលចន្លោះពី១ថ្ងៃទៅ៣ថ្ងៃ ដែលទាមទារទាំងការចំណាយពេលវាលា និង លុយកាក់របស់អ្នកចូលរួម។

៥ ចំណុចខាងក្រោម ជាអត្ថប្រយោជន៍ដែលបុគ្គលអាចទទួលបាន៖

១. ទទួលបានគំនិតនិងបទពិសោធន៍ថ្មី

ក្នុងសិក្ខាសាលានីមួយៗតែងមានការអញ្ជើញវាគ្មិនដែលមានបទពិសោធន៍ជ្រាលជ្រៅទាក់ទងនឹងប្រធានបទដែលលើកយកមកបង្ហាញ។ នេះជាឱកាសល្អដល់បុគ្គលនីមួយៗ។ ទស្សនិកជនអាចស្តាប់ពីគំនិតឫបទពិសោធន៍របស់អ្នកដទៃ ដើម្បីអភិវន្ឍទស្សនៈវិស័យរបស់ខ្លួន ជាជំនួយដល់ការវិនិច្ឆ័យបានគ្រប់ជ្រុងជ្រោយគ្រប់កាលៈទេសៈ។

២. ជម្រុញទឹកចិត្តខ្លួនឯងឲ្យសម្រេចកិច្ចការអ្វីមួយ

ជួនកាលក្នុងជីវភាពបច្ចុប្បន្នបុគ្គលម្នាក់អាចកំពុងខ្វះភាពក្លាហានឫកំពុងជួបប្រទះបញ្ហាដែលពិបាកដោះស្រាយ។ ការស្តាប់អំពីគំនិតអ្នកដទៃអាចជាកត្តាជម្រុញឲ្យយើងមានចិត្តជំនះឧបសគ្គទាំងនោះ។ម្យ៉ាងការយកគំនិតអ្នកដទៃមកស្តាប់ក៍អាចធ្វើឲ្យបុគ្គលនឹកឃើញដំណោះស្រាយថ្មីដែរ។

៣. យល់ដឹងពីហេតុការណ៍ក្នុងសង្គម

ជាទូទៅប្រធានបទលើកយកមកនិយាយក្នុងសិក្ខាសាលានីមួយៗតែងមានភាពខុសគ្នា។ហើយប្រធានបទ ទាំងនោះតែងលើកឡើងមកបង្ហាញដោយសារវាជាអ្វីដែលកំពុងកើតឡើងក្នុងសង្គម។ វាអាចជាតម្រូវការអ្វីមួយដែល មនុស្សគ្រប់រូបក្នងសង្គមបច្ចុប្បន្នគួរប្រកាន់ភ្ជាប់ ឫ អាចអំពីស្ថានភាពនៃវិស័យនីមួយៗក្នុងប្រទេសជាដើម។

៤. ស្វែងយល់ពីខ្លួនឯង

ក្នុងជីវិតមនុស្សម្នាក់ អ្វីដែលសំខាន់ជាងគេគឺការយល់ច្បាស់ពីខ្លួនឯង។ ការដែលទទួលស្តាប់យកនូវទស្សនៈ អ្នកដទៃ ជាផ្លូវមួយដែលអាចធ្វើឲ្យបុគ្គលយល់ដឹងបន្ថែមពីខ្លួនឯងអំពី អ្វីដែលខ្លួនចូលចិត្ត អ្វីជាគោលបំណងក្នុងជីវិត និង អ្វីដែលខ្លួនចង់ផ្លាស់ប្តូរដើម្បីជួយដល់សង្គមជាដើម។

៥. អភិវឌ្ឍការប្រាស្រ័យទាក់ទង

បច្ចុប្បន្ន ការប្រាស្រ័យទាក់ទងជាជំនាញទន់ ឫ គេហៅថា soft skill ពិតជាសំខាន់ ត្រូវការក្នុងគ្រប់ ស្ថានការណ៍ ដែលអាចប្រើប្រាស់ក្នុងកន្លែងធ្វើការ និង ការធ្វើជំនួញជាដើម។ ការចូលរួមសិក្ខាសាលា បុគ្គលម្នាក់ៗនឹង ជួបមនុស្សជាច្រើន ជាពេលដែលអាចហ្វឹកហាត់ការប្រាស្រ័យទាក់ទង និងបង្កើតទំនាក់ទំនងជាមួយអ្នកដទៃ។

យើងបានឃើញហើយថា ការចូលរួមក្នុងកម្មវិធីសិក្ខាសាលា អាចផ្តល់នៅអត្ថប្រយោជន៍ជាច្រើន ដូច្នេះហើយ ឆ្លៀតពេលទំនេរពីការសិក្សា ក៏ដូចជា ការងារផ្សេងៗ លោកអ្នកអាចស្វែងរកសិក្ខាសាលា ដែលលោកអ្នកចាប់អារម្មណ៏ ហើយចូលរួមសិក្សាស្វែងយល់នូវមតិយោបល់របស់ វាគ្និន ដើម្បីរៀនពីបទពិសោធន៏របស់ពួកគាត់ និងអភិវឌ្ឍខ្លួនឯងអោយកាន់តែប្រសើរឡើង។ 

អត្ថបទដោយសមាជិក Project Inspire: ហុង សុខម៉ូនីតា