ភ្នំពេញ៖ ប្រជាពលរដ្ឋមេត្តាកុំភ្លេចខ្លួន ឬធ្វេសប្រហែសឱ្យសោះ បើទោះបីជា ១១ថ្ងៃជាប់ៗគ្នាមកនេះ កម្ពុជាពុំមានរកឃើញករណីឆ្លងជំងឺកូវីដ១៩ ណាមួយក៏ដោយ។ នេះបើយោងតាមលោកស្រី យក់ សម្បត្តិ រដ្ឋលេខាធិការក្រសួងសុខាភិបាល។

ថ្លែងនៅក្នុងកិច្ចប្រជុំគណៈកម្មការអន្ដរក្រសួងលើកទី៣ ស្ដីពីការងារឆ្លើយតបការរាតត្បាតនៃជំងឺកូវីដ១៩ នាព្រឹកថ្ងៃទី២៣ ខែមេសា ឆ្នាំ២០២០ នេះ លោកស្រី យក់ សម្បត្តិ បានមានប្រសាសន៍ថា៖ “បងប្អូនប្រជាពលរដ្ឋយើងមួយចំនួនហាក់ដូចជាភ្លេចខ្លួន ដោយមានអ្នកខ្លះរហូតដល់មានការរាប់ថយក្រោយករណីជំងឺកូវីដ១៩ នៅព្រះរាជាណាចក្រកម្ពុជាយើង ដែលការធ្វើនេះគឺពុំត្រឹមត្រូវទេ”។

សូមជម្រាបផងដែរថា កម្ពុជាពុំមានករណីឆ្លងជំងឺកូវីដ១៩ ចំនួន ១១ថ្ងៃជាប់គ្នាមកហើយ ខណៈអ្នកជំងឺដែលកំពុងព្យាបាលនៅសល់តែ ១២នាក់ប៉ុណ្ណោះ ក្នុងចំណោមករណីឆ្លងសរុបចំនួន ១២២នាក់ ដោយក្នុងនោះបានព្យាបាលជាសះស្បើយសរុបចំនួន ១១០នាក់៕ ដោយ៖ តារា