ក្នុងអំឡុងពេលធ្វើសង្ខេបព័ត៌មាន​មួយ ​កាលពីថ្ងៃទី២៣ ខែមេសា ប្រធានាធិបតីអាមេរិក លោក ដូណាល់ ត្រាំ បានថ្លែងថា ការផ្សាយរបស់ប្រភពព័ត៌មាន CNN​ កាលពីថ្ងៃទី២០ ខែមេសា ស្តីអំពីមេដឹកនាំកូរ៉េខាងជើង លោក គីម ជុងអ៊ុន បាននិងកំពុងស្ថិតក្នុងស្ថានភាព​ឈឺធ្ងន់ធ្ងរ​នោះ គឺជាព័ត៌មាន​មិនត្រឹមត្រូវ ។ នេះបើតាមការផ្សាយរបស់ប្រភព sputnik ថ្ងៃទី២៤ ខែមេសា ឆ្នាំ២០២០។

លោកបានបន្ថែមថា «ខ្ញុំគិតថា ការផ្សាយនោះ​មិនពិត ។ ខ្ញុំគិតថា ការផ្សាយនោះ​ មានទាក់ទង​ជាមួយ​បណ្តាញ​មួយ​ដែល​មិនមានការពិត។ ខ្ញុំ​បាននិងកំពុងឮថា ពួកគេ​ប្រើប្រាស់ព័ត៌មាន​ចាស់...​​ខ្ញុំសង្ឃឹមថា វាជា​ការផ្សាយ​ព័ត៌មាន​មិនពិត» ។

នៅពេលត្រូវបានគេសួរថា តើ​មានបានទាក់ទង​ជាមួយ​កូរ៉េខាងជើងដែរឬទេ, លោកត្រាំ បាន​បដិសេធ​ផ្តល់ចម្លើយ ។ ប៉ុន្តែ​បានថ្លែងថា «ទំនាក់ទំនង​អាមេរិក​ជាមួយកូរ៉េខាងជើង គឺល្អ » ។ លោក​បានបញ្ជាក់ជាថ្មីថា រវាងលោក និងមេដឹកនាំគីម មានទំនាក់ទំនង​ល្អនឹងគ្នា ហើយ​លោក​សង្ឃឹមថា គាត់ (គីម ជុងអ៊ុន) ​​មិនមានបញ្ហាអ្វីកើតឡើង​ទៅចុះ»។ 

សូមរំឭកថា កាលពីថ្ងៃទី២០ ខែមេសា ឆ្នាំ២០២០ ប្រភពព័ត៌មាន CNN ​បានដកស្រង់ប្រភព​ពីមន្ត្រីមិនបញ្ចេញឈ្មោះ យកមកផ្សាយថា អាមេរិក​កំពុង​ពិនិត្យ​មើល​​ព័ត៌មានចារកម្ម ដែល​បានអះអាងថា លោក​ គីម ជុងអ៊ុន កំពុងស្ថិតក្នុងស្ថានភាពសុខភាពធ្ងន់ធ្ងរ ក្រោយពីការវះ​កាត់។ 

ប្រភពមិនបញ្ចេញឈ្មោះ តែជាមន្ត្រីអាមេរិក​ដទៃផ្សេងទៀត ក៏បានប្រាប់ CNN ទៀតថា សុខភាព​មេដឹកនាំកូរ៉េខាងជើង​ គឺអាច​ជឿទុកចិត្តបាន ប៉ុន្តែ​ស្ថានភាពធ្ងន់ធ្ងរ នៃជំងឺនេះ​ពិបាកក្នុងការវាយតម្លៃណាស់ ។ 

លោក គីម បានខកខាន​បង្ហាញវត្ដមាន នៅក្នុងពិធីប្រារព្ធខួប​​ជីតា​របស់គាត់​ កាលពីថ្ងៃទី១៥ ខែមេសា ជាហេតុនាំឲ្យមានការសង្ស័យ​ទៅលើបញ្ហាសុខភាព (ជំងឺសរសៃឈាមបេះដូង) ​របស់លោកបែបនេះ ៕ ប្រែសម្រួលដោយ៖ thach yat