ភ្នាក់ងាររបស់កីឡាករ Neymar លោក Wagner Ribeiro បានបង្ហើបឱ្យដឹងថា ប្រធានក្លិបស្តេច Real Madrid លោក Florentino Perez ចង់បានខ្សែបម្រើប្រយុទ្ធសញ្ជាតិប្រេស៊ីលរូបនេះជាច្រើនឆ្នាំមកហើយ ប៉ុន្តែតែងតែបរាជ័យជាច្រើនលើកច្រើនសា។

Neymar ជាកីឡាករដែល Real Madrid តែងតែចង់បានយូរណាស់មកហើយ ពោលគឺចាប់តាំងពីរូបគេលេងនៅក្លិប Barcelona មកម្ល៉េះ មុនផ្លាស់ទៅចូលរួមជាក្លិបអ្នកមានរបស់បារាំង Paris Saint-Germain កាលពីឆ្នាំ២០១៧ ប៉ុន្តែមកទល់ពេលបច្ចុប្បន្ននេះ លោក Perez នៅតែចង់បានជម្រើសជាតិប្រេស៊ីលរូបនេះដដែល ខណៈពេលដែលក្លិបចាស់ Barca ក៏កំពុងចង់បានខ្សែបម្រើប្រយុទ្ធរូបនេះត្រឡប់ទៅកាន់ទឹកដី Camp Nou វិញផងដែរ។

យ៉ាងណាមិញបើតាមលោក Ribeiro ភ្នាក់ងាររបស់កីឡាកររូបនេះ បានបង្ហើបប្រាប់ពីការចង់បានរបស់ប្រធានក្លិប Madrid លោក Perez នៅក្នុងកម្មវិធី Canal do Nicola របស់ទូរទស្សន៍អាមេរិក ESPN យ៉ាងដូច្នេះថា៖ “ខ្ញុំបានទៅទីក្រុងម៉ាឌ្រីដជាច្រើនដងដោយសារតែលោក Florentino មានក្តីសុបិនចង់យក Neymar។ កាលពីឆ្នាំមុនខ្ញុំបានទៅជួបជាមួយគាត់(Perez ) នៅក្នុងខែឧសភានៅក្នុងការិយាល័យរបស់គាត់ ហើយគាត់ថែមទាំងបានប្រាប់ខ្ញុំថាគាត់នៅតែសុបិនចង់ចុះហត្ថលេខាជាមួយ Neymar ជានិច្ច”៕

កែសម្រួលដោយ៖ ភារ៉ា

ប្រភព៖ livescore