លោក ស៊ុន ចាន់ថុល សន្យាស្តារប្រព័ន្ធរំដោះទឹកកខ្វក់នៅក្រុងព្រះសីហនុឲ្យបានលឿនបំផុត

ភ្នំពេញ៖ ការស្តារប្រព័ន្ធរំដោះទឹកកខ្វក់នៅខេត្តព្រះសីហនុនឹងស្តារឱ្យបានលឿនបំផុត ដើម្បីបញ្ចៀសនូវជំនន់ទឹកភ្លៀងដែលតែងតែជន់លិចនៅរដូវវស្សា ក្នុងរយៈពេលប៉ុន្មានឆ្នាំជាប់ៗគ្នាកន្លងមកនេះ។ នេះបើយោងតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ថ្លែងការពីថ្ងៃទី២៧ ខែមេសា ឆ្នាំ២០២០នេះ។

លោកទេសរដ្ឋមន្ត្រី ស៊ុន ចាន់ថុល បានបញ្ជាក់ថា ផែនការមេគ្រប់គ្រងប្រព័ន្ធទឹកកខ្វក់នៅខេត្តព្រះសីហនុ ត្រូវបានរៀបចំរួចហើយ ហើយស្ថានីយបូមទឹកកខ្វក់ចំនួនបីស្ថានីយ ក៏បានសិក្សារួច រួមទាំងការស្ដារអូរប្រឡាយនានាត្រូវបានពន្លឿនការសាងសង់ និងស្ដារឲ្យបានលឿនបំផុត ដើម្បីរក្សាបាននូវកំណើនទេសចរថែមទៀតចូលទៅទស្សនានៅខេត្តជាប់សមុទ្រមួយនេះ។

គួរឱ្យដឹងថា ក្រសួងសាធារណការ និងដឹកជញ្ជូន បាននឹងកំពុងស្តារឡើងវិញនូវអូរសំខាន់ៗចំនួន ៥មាន៖ អូរអណ្ដូងអ៊ុនតាក់ អូរស្ពានឆេះ អូរសំអាត អូរអេម៉ារីអូ និងអូរឈើទាល មានប្រវែងសរុបជិត ៣ម៉ឺនម៉ែត្រ នៅក្រុងព្រះសីហនុ ឲ្យចប់រួចរាល់នៅរដូវវស្សាខាងមុខនេះ ដើម្បីការពារជន់លិចលង់ដោយសារជំនន់ទឹកភ្លៀងនៅតាមតំបន់ងាយរងគ្រោះនៅក្នុងក្រុង ក៏ដូចជារៀបចំប្រព័ន្ធប្រឡាយទឹកនៅទីក្រុងមួយនេះឲ្យមានបរិស្ថានស្អាត និងអនាម័យល្អ។ ការអភិវឌ្ឍឡើងវិញនូវប្រព័ន្ធរំដោះទឹកកខ្វក់ទាំងនេះ គ្រោងថវិកាជាង ១០ពាន់លានរៀល ឬប្រមាណ ២,៥លានដុល្លារអាមេរិក។

សូមបញ្ជាក់ថា តាមការប៉ាន់ប្រមាណថា បរិមាណទឹកកខ្វក់ក្នុងក្រុងព្រះសីហនុ នឹងមានបរិមាណប្រមាណ ៤,៧ម៉ឺនម៉ែត្រគូប ក្នុងមួយថ្ងៃ នៅឆ្នាំ២០២៣ និងប្រមាណ ៦,៤ម៉ឺនម៉ែត្រគូប ក្នុងមួយថ្ងៃ នៅឆ្នាំ២០៣០ ខណៈបច្ចុប្បន្ន បរិមាណនេះបានកើនដល់ ៣ម៉ឺនម៉ែត្រគូប ក្នុងមួយថ្ងៃ៕ ដោយ៖ តារា