មណ្ឌលគិរី៖ សត្វដំរីអាស៊ីមួយហ្វូងត្រូវបានក្រុមការងារស្រាវជ្រាវសត្វព្រៃនៃអង្គការ WWF ប្រទះឃើញ នៅពាក់​កណ្តាល​ខែមេសា ឆ្នាំ២០២០នេះ នៅក្នុង​ខេត្តមណ្ឌលគិរី។

បើតាមផេកផ្លូវការរបស់អង្គការ WWF បានឱ្យដឹងថា នៅក្នុងចំណោមហ្វូងសត្វដំរីអាស៊ីនេះ មានដំរីពេញវ័យប្រមាណជាចំនួន ៥ក្បាល កូនដំរី ចំនួន ៤ក្បាល និងដំរីវ័យជំទង់ប្រមាណជាចំនួន ៤ក្បាលផងដែរ។ ជាមួយគ្នានេះ តាមរយៈ​វីដេអូដែលក្រុមការងារស្រាវជ្រាវសត្វព្រៃនៃអង្គការ WWF ថតបាន សង្កេតឃើញដែរថា កូនដំរី​បានផ្តុំគ្នានៅជិតមេរបស់ពួកគេ ខ្លះទំពាអៀង ខ្លះទៀត យោលប្រមោយលេងជាមួយមេរបស់​ខ្លួន ខណៈពូជដំរីអាស៊ីមួយហ្វូងនេះ កំពុងតែសម្រាកជុំគ្នានៅក្នុងទីជម្រកព្រៃ​ល្បោះមួយនេះ​យ៉ាងសុខសាន្ត។

តាមរយៈវីដេអូខ្លីដែលថតដោយសមាជិកក្រុមស្រាវជ្រាវ ពីលើដើមឈើមួយដែលជាទីខ្ពស់សុវត្ថិភាព ជាភស្តុតាងមួយដែលបង្ហាញអំពីវត្តមាននៃពូជដំរីអាស៊ីនៅក្នុងតំបន់ព្រៃ​ការពារ និងលទ្ធភាពបង្កកំណើតរបស់ពួកវា ដែលជាសញ្ញាវិជ្ជមានសម្រាប់ការអភិរក្ស៕ ដោយ៖ តារា