សេចក្តីព្រាងច្បាប់​ បានស្នើចំណាយប្រាក់​១ពាន់ពាន់លានដុល្លារ​ជួយដល់បណ្តារដ្ឋ​ និងតំបន់ដែលរងផលប៉ះពាល់ខ្លាំងជាងគេ ដោយ​សារ​កូវីដ​១៩។ បច្ចុប្បន្ន នៅទូទាំងអាមេរិក មានករណីឆ្លងកូវីដ១៩ កើនឡើងដល់ជិត​១,៣៦លាននាក់ និងស្លាប់ជិត៨ម៉ឺនាក់ ។

សភាអាមេរិក ដឹកនាំដោយគណបក្សប្រជាធិបតេយ្យ កាលពីថ្ងៃទី​១២ ខែឧសភា បានស្នើច្បាប់ កាត់បន្ថយផលប៉ះពាល់ ដោយសារកូវីដ​១៩ ហើយត្រូវចំណាយប្រាក់ រហូតដល់ទៅ​៣ពាន់ពាន់លានដុល្លារ ដើម្បីជួយដល់បណ្តារដ្ឋ ក្រុមហ៊ុន និងគ្រួសារដែលរងផលប៉ះពាល់​។ ប៉ុន្តែសេចក្តីព្រាងច្បាប់ច្បាប់ អាចនឹងមិនទទួលបានការអនុម័តពីព្រឹទ្ធសភា គ្រប់គ្រងដោយគណបក្សសាធារណរដ្ឋនោះឡើយ។

នៅក្នុងសេចក្តីព្រាងច្បាប់នោះ ទឹកប្រាក់​៧៥ពាន់លានដុល្លារ សម្រាប់ការធ្វើតេស្តរកកូវីដ​១៩ ដោយត្រូវចំណាយរហូតដល់​៦ពាន់ដុល្លារ សម្រាប់គ្រួសារនីមួយៗ នៅអាមេរិក។ ប្រាក់​១០ពាន់​លានដុល្លារ ជួយដល់បណ្តាក្រុមហ៊ុនតូច និង​២៥ពាន់លានដុល្លារ ជួយដល់សេវាកម្ម ប្រៃសណីយ៍​ ។ ជាមួយគ្នានេះដែរ ក្នុងសេចក្តីព្រាងច្បាប់ក៏បានជួយដល់ពលរដ្ឋដែលអត់ការងារធ្វើ រហូតដល់ខែមករា ឆ្នាំ​២០២១ផងដែរ។

បើតាមគម្រោងនេះ សភាអាមេរិក នឹងបើកកិច្ចប្រជុំ​ ដើម្បីបោះឆ្នោតអនុម័តទៅលើសេចក្តីព្រាងច្បាប់ខាងលើ នៅថ្ងៃទី​១៥ ខែឧសភា ខាង​មុខ។ ​ប៉ុន្តែ​ព្រឹទ្ធសភាអាមេរិកគ្រប់គ្រងដោយគណបក្សសាធារណរដ្ឋ បានបង្ហាញការមិនគាំទ្រទៅលើសេចក្តីព្រាងច្បាប់ខាងលើនេះ​ឡើយ៕ ប្រែសម្រួលដោយ៖ MEO