ភ្នំពេញ៖ ក្នុងនាមជាប្រធានគណៈកម្មាការអន្តរក្រសួងដើម្បីប្រយុទ្ធជំងឺកូវីដ១៩ ក្រសួងសុខាភិបាលបានណែនាំដល់អាជ្ញាធរថ្នាក់ក្រោមជាតិ និងប្រជាពលរដ្ឋកម្ពុជាទាំងអស់ បន្តចូលរួមការពារហានិភ័យនៃការចម្លងកូវីដ១៩ និងកាត់បន្ថយផលប៉ះពាល់លើសេដ្ឋកិច្ច​ និងសង្គមដោយអនុវត្តតាមគោលការណ៍សំខាន់ៗចំនួន៦។ នេះបើតាមលិខិតរបស់លោករដ្ឋមន្ត្រី ម៉ម ប៊ុនហេង ផ្ញើជូនអភិបាលរាជធានីខេត្តទាំងអស់ កាលពីថ្ងៃទី១៩ ខែឧសភា ឆ្នាំ២០២០នេះ។ 

គោលការណ៍ណែនាំសំខាន់ៗទាំង៦ មានដូចខាងក្រោម

ទី១ បន្តធ្វើឲ្យសកម្មនូវដំណើរការប្រយុទ្ធនឹងជំងឺកូវីដ១៩

ទី២ ជំរុញលើកទឹកចិត្តប្រជាជនក្នុងដែនសមត្ថកិច្ចរបស់ខ្លួន​ឲ្យមានការយល់ដឹង និងអនុវត្តការផ្លាស់ប្តូរកែប្រែទម្លាប់ និងឥរិយាបទនៃការរស់នៅរបស់ខ្លួនស្របតាមរបត់នៃការរស់នៅ “សកម្មភាពធម្មតាតាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ១៩”។

ទី៣ ហាមឃាត់មិនឲ្យជួបជុំ ឬរៀបពិធីណាមួយដែលមានអ្នកចូលរួមកុះករ។

ទី៤ ត្រូវតាមដាន និងត្រួតពិនិត្យតាមភោជនីយដ្ឋានព្រមទាំងកន្លែងលក់ដូរនានា ដើម្បីឲ្យម្ចាស់ហាងទាំងអស់នោះ បន្តអនុវត្តវិធានការការពារការចម្លងកូវីដ១៩។

ទី៥ ជំរុញប្រជាពលរដ្ឋមកពីក្រៅប្រទេសដែលមិនបានពិនិត្យសុខភាព ឲ្យធ្វើចត្តាឡីស័ក ១៤ថ្ងៃ។

និងទី ៦ ចុះពិនិត្យស្ថានភាពនៅកន្លែងស្នាក់នៅ របស់អ្នកចត្តាឡីស័កនៅតាមផ្ទះ ដែលបញ្ជូនមកពីមណ្ឌលពិនិត្យសុខភាព​ខេត្ត និងមណ្ឌលសុខភាព ឬ មន្ទីរពេទ្យបង្អែក និងរៀបចំចាត់ចែងការងារបន្ត ឲ្យបានហ្មត់ចត់ជាទីបំផុត៕ ដោយ៖ ប៊ុនធឿន