អ៊ីរ៉ង់ បានប្រាប់​ភ្នាក់ងារ​អាកាសចរណ៍​អង្គការសហប្រជាជាតិ​ កាលពីថ្ងៃទី១០ ខែមិថុនា ឆ្នាំ២០២០ថា ខ្លួនអាចបញ្ជូន​ប្រអប់ខ្មៅ​យន្តហោះអ៊ុយក្រែន ​ដែលត្រូវបាញ់​ធ្លាក់​នោះ ​ទៅកាន់ទីក្រុងប៉ារីស ​ដើម្បីធ្វើវិភាគ នៅពេលដែលប្រទេសទាំងឡាយ​ ដែលពាក់ព័ន្ធ​បានយល់ព្រម។ 

ប្រទេស​ពាក់ព័ន្ធ​ក្នុងហេតុការណ៍ធ្លាក់​យន្តហោះ នៅអ៊ីរ៉ង់នោះ មានដូចជា​អ៊ុយក្រែន កាណាដា និងសហរដ្ឋអាមេរិក ។ កាលពីមុន​ ប្រទេសកាណាដា​ បានស្នើ​ឲ្យអ៊ីរ៉ង់​បញ្ជូនប្រអប់ខ្មៅ​ទៅប្រទេសបារាំង ​ដើម្បីធ្វើវិភាគ។ 

ប៉ុន្តែរដ្ឋាភិបាលអ៊ីរ៉ង់ បានបដិសេធប្រគល់​ប្រអប់ខ្មៅ​ ដែលថតសកម្មភាព​នៅលើជើងហោះហើរ​អន្តរជាតិរបស់អ៊ុយក្រែន។ យន្តហោះអ៊ុយក្រែនត្រូវបានបាញ់ទម្លាក់​ កាលពីថ្ងៃទី៨ ខែមករា ឆ្នាំ២០២០ នៅក្បែរទីក្រុងតេអេរ៉ង់ តាមរយៈប្រព័ន្ធមីស៊ីល​បាញ់ចេញពីដី​ទៅ​លើអាកាស ដោយសម្លាប់​មនុស្ស​ចំនួន​១៧៦​នាក់ ក្នុងនោះ​មានជនជាតិកាណាដា​៥៥នាក់ ។ 

លុះនៅក្នុងខែមីនា​ ឆ្នាំ២០២០ អ៊ីរ៉ង់​បានប្រាប់ភ្នាក់ងារអាកាសចរអង្គការសហប្រជាជាតិថា ខ្លួនអាចបញ្ជូនប្រអប់ខ្មៅ​ទៅឲ្យប្រទេសអ៊ុយក្រែន ។ ប៉ុន្តែ​នៅថ្ងៃទី​១០ ខែមិថុនា ឆ្នាំ២០២០ អ្នកតំណាងមកពីប្រទេសអ៊ីរ៉ង់ បានបញ្ជាក់នៅក្នុងកិច្ចប្រជុំជាក់លាក់​របស់ក្រុមប្រឹក្សាគ្រប់គ្រង​ភ្នាក់ងារអាកាសចរណ៍អង្គការសហប្រជាជាតិថា ទីក្រុងតេអេរ៉ង់ នឹងបញ្ជូនប្រអប់ខ្មៅដែលខូចខាតធ្ងន់ធ្ងរនោះ ទៅឲ្យទីភ្នាក់ងារស៊ើបអង្កេតគ្រោះថ្នាក់​ផ្លូវអាកាស BEA របស់ប្រទេសបារាំង ដើម្បីវិភាគ ។

ប្រភពបាននិយាយក្នុងលក្ខខណ្ឌអនាមិកថា “អ៊ីរ៉ង់បានបញ្ជាក់ថា នឹងបញ្ជូនប្រអប់ខ្មៅទៅកាន់ទីក្រុងប៉ារីស​ក្នុងពេលឆាប់ៗនេះ ក្រោមកិច្ចព្រមព្រៀងរបស់ប្រទេស​ដែលពាក់ព័ន្ធនឹងការស៊ើបអង្កេតនេះ” ។

អ្នកនាំពាក្យរបស់រដ្ឋមន្រ្តីក្រសួងដឹកជញ្ជូនកាណាដា Marc Garneau បានបដិសេធមិនធ្វើអត្ថាធិប្បាយលើការពិភាក្សាអំពីប្រអប់ខ្មៅ ដែលត្រូវបានបញ្ជូនទៅកាន់ទីក្រុងប៉ារីសនោះទេ។

ប្រទេសអ៊ីរ៉ង់បានប្តេជ្ញាកាលពីខែមីនា ឆ្នាំ២០២០ថា ពួកគេនឹងបើកចំហរនៅក្នុងការបញ្ជូនប្រអប់ខ្មៅនេះ ។

យោងតាមវិធានរបស់អង្គការសហប្រជាជាតិ អ៊ីរ៉ង់រក្សាការត្រួតពិនិត្យជាទូទៅការស៊ើបអង្កេត ខណៈដែលសហរដ្ឋអាមេរិក និងអ៊ុយក្រែន ត្រូវបានទទួលស្គាល់ជាប្រទេសដែលយន្តហោះនេះផលិត និងប្រតិបត្តិការ ខណៈប្រទេសកាណាដា ក៏បានដើរតួជាប្រទេសដែលជនរងគ្រោះបំផុត​ក្នុងហេតុការណ៍​បាញ់​ទម្លាក់​យន្តហោះ​នោះផងដែរ ៕ ប្រែសម្រួលដោយ៖ thach yat