នាយករដ្ឋមន្រ្តីអង់គ្លេសលោក បូរីស ចនសុន (Boris Johnson) បានជួបគ្រោះថ្នាក់ចរាចរណ៍តូចមួយ កាលពីថ្ងៃទី១៧ ខែមិថុនា ឆ្នាំ២០២០ បន្ទាប់ពីអ្នកតវ៉ាម្នាក់បានរត់កាត់ នៅខាងមុខយានយន្ត នៅពេលដែលចាកចេញពីរដ្ឋសភា ។  

រូបភាពដែលបានបង្ហោះនៅលើបណ្តាញសង្គមបានបង្ហាញថា បុរសម្នាក់កំពុងរត់សំដៅឆ្លងកាត់រថយន្ត Jaguar ពណ៌ទឹកប្រាក់ របស់លោក បូរីស ចនសុន ខណៈដែលរថយន្តបានបើកចេញ ពីទ្វារអគាររដ្ឋសភាអង់គ្លេស ហើយមានអមដោយម៉ូតូប៉ូលីស និងរថយន្តអង្គរក្ស Range Rover​ផងដែរ ។

រថយន្តរបស់លោកនាយករដ្ឋមន្ត្រី ចនសុន ចាប់ហ្វ្រាំងភ្លាមៗ ហើយត្រូវរថយន្ត Range Rover បុកពីក្រោយ បណ្តាលឱ្យរងខូចខាត ។ 

ខុទ្ទការិយាល័យរបស់នាយករដ្ឋមន្រ្តីបានបញ្ជាក់ថា លោក ចនសុន ស្ថិតនៅក្នុងរថយន្ត ហើយមិនមានរងរបួសធ្ងន់ធ្ងរណាមួយឡើយ ។

រដ្ឋមន្រ្តីក្រសួងវប្បធម៌អង់គ្លេស​ Oliver Dowden បានថ្លែងនៅក្នុងសន្និសីទសារព័ត៌មានមួយថា លោក ចនសុន «មានសុវត្ថិភាពនោះទេ» ។ 

បាតុករដែលរត់សំដៅ​ទៅរថយន្ត​លោកនាយករដ្ឋមន្ត្រី ត្រូវ​ប៉ូលិសឃាត់ខ្លួន ។ ប៉ូលិស​បានឃុំខ្លួន​ពីបទ​បំពានសណ្តាប់ធ្នាប់សាធារណៈ និងរារាំង​​ដល់ផ្លូវល្បឿនលឿន ៕ ប្រែសម្រួលដោយ៖ thach yat