អតីតគ្រូបង្រៀនតន្ត្រីនិងរបាំគ្មានការងារធ្វើម្នាក់អាយុ ៣៣ ឆ្នាំ ត្រូវបានចាប់ខ្លួនពីបទទាញយករូបភាព​អាសអាភាសកុមារនៅខេត្តឈៀងម៉ៃ។​

កាលពីថ្ងៃសុក្រទី១៩ ខែមិថុនា​គាត់ត្រូវបានចាប់ខ្លួនក្រោយពីប៉ូលិសខេត្តឈៀងម៉ៃបានសហការជាមួយក្រុមការងារតាមប្រព័ន្ធអ៊ីនធឺណិតប្រឆាំងនឹងបទឧក្រិដ្ឋលើកុមារដោយឆ្មក់ចូលផ្ទះមួយនៅក្នុងស្រុក ​Saraphee ​ដែលត្រូវបានគេដឹងថាម្ចាស់ផ្ទះជាប់ពាក់ព័ន្ធនឹង​សកម្មភាព​ទាញយករូបភាព​អាសអាភាស​កុមារ​អាយុ ១០ឆ្នាំ។  

ក្រុមមន្រ្តីបានចាប់ខ្លួនជនល្មើសឈ្មោះ Chai ​ បន្ទាប់ពីពួកគេបានរកឃើញរូបភាពអាសអាភាសជាច្រើនរបស់កុមារានិងកុមារីនៅក្នុងកុំព្យូទ័រយួរដៃពីរគ្រឿង ទូរស័ព្ទចល័តពីរគ្រឿង និងនៅក្នុងឧបករណ៍​ USB ជាច្រើនទៀត។ ​រូបគេបានសារភាពថា​បានទាញយករូបទាំងនោះ បន្ទាប់ពីចូលរួមជាមួយក្រុមគណនី Line នៅលើប្រព័ន្ធអ៊ីនធឺណិត​។ ការស៊ើបអង្កេតក៏បានបង្ហាញផងដែរថា ជន​ល្មើសធ្លាប់ជាគ្រូបង្រៀនតន្រ្តីនិងរបាំនៅសាលាឯកជនមួយក្នុងខេត្តឈៀងម៉ៃ តែពេលនេះបានបាត់បង់ការងារហើយបន្ទាប់ពីកិច្ចសន្យារបស់គាត់ជាមួយសាលាបានបញ្ចប់។ ជនល្មើសនឹងត្រូវជាប់ពន្ធនាគាររយៈពេល ៥ឆ្នាំ និងត្រូវពិន័យជាប្រាក់ចំនួន ១០០០០០បាត។

ប៉ូលិសក៏នឹងធ្វើការស៊ើបអង្កេតផងដែរទៅលើក្រុមគណនី Line ដែល​​អាច​​ជាជនសង្ស័យក្នុងការជួញដូរមនុស្ស។ ក្រុមការងាររបស់ ​ICAC បានចាប់ផ្តើមប្រតិបត្តិការសង្គ្រោះកុមារក្នុងអំឡុង​ពេលដែលឧក្រិដ្ឋកម្ម​ទាក់ទងនឹងកុំព្យូទ័របានកើនឡើង។ ក្នុងរយៈពេល ៥៦ថ្ងៃនៃប្រតិបត្តិការនៅក្នុងខេត្តចំនួន២៤ ពួកគេ​​ចាប់ខ្លួនជនល្មើសបានចំនួន ៤៧នាក់ ​ជួយជនរងគ្រោះប្រហែល ១០០នាក់ ​និង​រឹបអូសយករូបភាពអាសអាភាសរបស់កុមារបានជាង ១៥០០០០រូបភាព​ផងដែរ។ 

កែសម្រួលដោយ៖ ភារ៉ា

ប្រភព៖ The Nation thailand