TNAOT News
· 2020-09-18
រមណីយដ្ឋានទឹកធ្លាក់ចំការស្វាយ ឆក់យកជីវិតភ្ញៀវម្នាក់
#រមណីយដ្ឋាន# #លង់ទឹក# #សង្គម# #ចំការស្វាយ# #ព័ត៌មានសង្គម#
3446
ខេត្តបាត់ដំបង ៖ បើតាមសមត្ថកិច្ចបានឱ្យដឹងថា យុវជនម្នាក់បានលង់ទឹកបណ្តាលឱ្យបាត់បង់ជីវិតនៅក្នុងរមណីយដ្ឋានទឹកធ្លាក់ចំការស្វាយ បង្កឱ្យមានការភ្ញាក់ផ្អើលកាលពីម៉ោង៩និង២០នាទីព្រឹក ថ្ងៃទី១៨ ខែកញ្ញា ឆ្នាំ២០២០ ស្ថិតក្នុងភូមិស្រែជីពៅ ឃុំមានជ័យ ស្រុកសំឡូត។
ជនរងគ្រោះខាងលើឈ្មោះ យឿត ម៉េងហួរ ភេទប្រុស អាយុ១៧ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល។ ហើយបើតាមសេចក្ដីរាយការណ៍ឱ្យដឹងថា យុវជនរូបនេះបានចុះហែលលេងនៅកន្លែងទឹកជ្រៅ ដោយគ្មានអាវសម្រាប់ពាក់ការពារនោះទេ ហើយទំនងជាទឹកកួចខ្លាំងផង ទើបបណ្ដាលឱ្យលង់រហូតបាត់បង់ជីវិតបែបនេះ។
ពាក់ព័ន្ធនឹងករណីខាងលើនេះ គេនៅមិនទាន់ដឹងថា តើទីកន្លែងដែលមានទឹកជ្រៅនៅរមណីយដ្ឋានទឹកធ្លាក់ចំការស្វាយដ៏ពេញនិយមមួយនេះ ត្រូវបានម្ចាស់រមណីយដ្ឋានដាក់ស្លាកសញ្ញា ដើម្បីហាមឃាត់ភ្ញៀវដែរឬយ៉ាងណានោះទេ? បានជាបណ្ដែតបណ្ដោយឱ្យភ្ញៀវចុះហែលលេង រហូតមានគ្រោះថ្នាក់បែបនេះ?
ប៉ុន្តែបើតាមប្រភពព័ត៌មាននៅកន្លែងកើតហេតុបានឱ្យដឹងថា អ្នកបំរើការនៅរមណីយដ្ឋាន បានប្រាប់ ឬណែនាំភ្ញៀវខ្លះៗដែរ ហាមមិនឱ្យចុះហែលកន្លែងដែលមានទឹកជ្រៅនោះទេ តែដោយសារតែមានមនុស្សច្រើនពេក ទើបមិនអាចគ្រប់គ្រងបាន ហើយណាមួយភាគច្រើនភ្ញៀវដែលចុះទៅលេងទឹក ដោយមិនមានអាវពោងពាក់ការពារឡើយ។
ប្រភពដដែលបានបញ្ជាក់ថា ជនរងគ្រោះដែលលង់ទឹកខាងលើនោះ បានហែលទៅកន្លែងទឹកជ្រៅ ហើយគ្មានអាវពោងពាក់ការពារ ទើបជួបគ្រោះថ្នាក់បែបនេះ៕ ផ្តល់សិទ្ធិដោយ៖ កោះសន្តិភាព
សេចក្តីថ្លែងការណ៍លើកលែង
អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។
ស្នាដៃពេញនិយមរបស់គាត់
យោបល់ទាំងអស់ (0)