ភ្នំពេញ៖ អ្នកសារព័ត៌មាន ដែលបានចូលរួមផ្សព្វផ្សាយកីឡាអាស៊ានប៉ារ៉ាហ្គេមលើកទី១២ នៅកម្ពុជានេះ មានចំនួនច្រើន ជាងកាលពី ការរៀបចំកន្លងមកមុនៗនៅតាមបណ្តាប្រទេសអាស៊ានមួយចំនួន ដែលធ្វើឱ្យការ ផ្សព្វផ្សាយនេះកាន់តែទូលំទូលាយ ​និងគ្រប់ជ្រុងជ្រោយ។ ប្រភពរូបភាព៖ AKP

នេះបើតាមការថ្លែងរបស់ នៅក្នុងសន្និសីទសារព័ត៌មានរួមមួយ កាលពីល្ងាចថ្ងៃទី០៨ ខែមិថុនា ឆ្នាំ២០២៣ នៅមជ្ឈមណ្ឌលកណ្តាលសារព័ត៌មាន នៃពហុកីឡដ្ឋានជាតិមរតកតេជោ ស្តីពីដំណើរការនៃការប្រកួត កីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ឯកឧត្តម ផុស សុវណ្ណ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន និងជាប្រធានគណៈកម្មាធិការព័ត៌មាន និងផ្សព្វផ្សាយព្រឹត្តិការណ៍កីឡាអាស៊ានប៉ារ៉ាហ្គេមលើកទី១២។

ឯកឧត្តម ផុស សុវណ្ណ បាននិយាយថា «អ្នកសារព័ត៌មាន ដែលបានចូលរួមផ្សព្វផ្សាយកីឡាអាស៊ានប៉ារ៉ាហ្គេមលើកទី១២ នៅកម្ពុជានេះ មានចំនួនច្រើនជាងកាលពី ការរៀបចំកន្លងមកមុនៗនៅតាមបណ្តាប្រទេសអាស៊ានមួយចំនួន ដែលធ្វើឱ្យការផ្សព្វផ្សាយនេះកាន់តែទូលំទូលាយ ​និងគ្រប់ជ្រុងជ្រោយ»។

ឯកឧត្តម ផុស សុវណ្ណ បានបន្តនិយាយថា «កន្លងមក មានការសាកសួរថា តើអ្នកសារព័ត៌មានប៉ុន្មាននាក់ ដែលបានចុះឈ្មោះចូលរួមផ្សព្វផ្សាយអាស៊ានប៉ារ៉ាហ្គេមនេះ ហើយពីមុនមានការបញ្ជាក់ត្រឹម តែថាប្រហាក់ប្រហែលជាងមួយពាន់នាក់ ដូច្នេះនៅពេលនេះ ខ្ញុំសូមបញ្ជាក់ឱ្យច្បាស់តែម្តង នូវតួលេខជាក់លាក់នៃចំនួនអ្នកសារព័ត៌មានដែលបានចុះឈ្មោះមានចំនួន ១,៧៣៨នាក់ ដែលបានចុះឈ្មោះយកព័ត៌មាន ចូលរួមការងារបច្ចេកទេសផ្សេងៗ និងផ្សព្វផ្សាយអំពី អាស៊ាន ប៉ារ៉ាហ្គេមលើកទី១២នេះ ដោយក្នុងនោះមានអ្នកសារព័ត៌មានអន្តរជាតិចំនួន ១១០នាក់។ ចំនួននេះ ខ្ញុំគិតថាជាចំនួនច្រើនគួរសម បើប្រៀបធៀបទៅនឹងចំនួន អ្នកសារព័ត៌មាន នៅក្នុងព្រឹត្តិការណ៍អាស៊ានប៉ារ៉ាហ្គេមកន្លងទៅដែលមានចំនួនចន្លោះពី ១.០០០ ទៅ ១.២០០នាក់»។

ជាមួយគ្នានោះ មានស្ថានីយទូរទស្សន៍ក្នុងស្រុកចំនួន១៤ និងមានទូរទស្សន៍ផ្កាយ រណបចំនួន៥​ ដែលបានចូលរួមផ្សព្វផ្សាយព្រឹត្តិការណ៍កីឡាជនពិការទាំង ១៤ប្រភេទ។ ស្ថានីយទូរទស្សន៍ទាំងនោះ បានផ្សព្វផ្សាយពីព្រឹត្តិការណ៍នេះជាមធ្យម ៧ម៉ោង ក្នុងមួយថ្ងៃ ហើយទូរទស្សន៍ផ្កាយរណបផ្សាយរហូតដល់ទៅ ១២ម៉ោង ក្នុងមួយថ្ងៃ ដោយយើងបានធ្វើការ ផ្សព្វផ្សាយយ៉ាងទូលំទូលាយចាប់តាំងពីថ្ងៃទី០២ ខែមិថុនាមក រហូតដល់ថ្ងៃពិធីបិទព្រឹត្តិការណ៍ កីឡាអាស៊ានប៉ារ៉ាហ្គេមលើកទី១២ នេះ៕