អ្នកលេងគុនខ្មែរសម្បូរស្នៀត បឺត សង្ឃឹម កាលពីថ្ងៃម្សិលមិញនេះ បានបង្ហោះសារមួយនៅលើសង្គមហ្វេសបុករបស់ខ្លួន ដោយបានបញ្ជាក់ថា នៅថ្ងៃ១៥ មិនា ឆ្នាំ២០២៥ អ្នកលេងគុនខ្មែរមាឌល្អិតចិត្តយក្សរូបនេះ នឹងត្រូវជួបរបស់ពិត ម្ចាស់មេដាយពិភពលោក ៩គ្រឿង គឺកីឡាកររុស្ស៊ី Aslanbek Zikreev ជាកីឡាករល្អលំដាប់ប្រទេសមួយរូបនាសង្វៀនទូរទស្សន៍មួយនៅក្នុងស្រុក។

យ៉ាងណាមិញ អ្នកលេងគុនខ្មែរចិត្តសាស្រ្តរូបនេះ បានបង្ហើបបន្ថែមទៀតថា នាខែមេសា រូបគេនឹងត្រូវចេញទៅក្រៅស្រុកជួបម្ចាស់ផ្ទះអូស្រ្តាលី ដែលមានខ្សែរក្រវ៉ាត់ ៨គ្រឿងក្នុងស្ថាប័ន WBC និង I S K A ដែលអ្នកគាំទ្រប្រដាល់គុនខ្មែរពិតជាអន្ទះសារចង់ឃើញអ្នកលេងគុនខ្មែររូបនេះ ថាតើលទ្ធផលពីរប្រកួតប៉ះម្ចាស់ខ្សែរក្រវ៉ាតលំដាប់ប្រទេស តើរូបគេនឹងធ្វើបានល្អដែរឬអត់?យ៉ាងណាមិញ ទូច រ៉ាឆាន់ ហៅ បឺត សង្ឃឹម នៅតែអំពាវនាវដល់អ្នកស្នេហាវិស័យប្រដាល់គុនខ្មែរ មានការយោគយល់ដល់រូបគេ ត្បិតកីឡាប្រកួតលើសង្វៀនតែងតែមានចាញ់ ឬឈ្នះ ទោះបីជាលទ្ធផលយ៉ាងណា សង្ឃឹមបងប្អូនយោគយល់ ពេលជោគជ័យលើកទឹកចិត្ត ពេលបរាជ័យបើកចិត្តទទួលយកលទ្ធផលមួយនេះ។

បឺត សង្ឃឹម ត្រូវបានគេមើលឃើញថា ជាកីឡាករជំនាន់ក្រោយក្នុងត្រកូលបឺតតែម្នាក់ដែលអាចស្នងតំណែងអ្នកមុនៗ ជាពិសេសក្នុងដំណាក់កាលដែលបឺត សំខាន់ និង បឺត សំរេច ជាដើម បានសម្រេចឈប់ឡើងប្រកួតនឹងប្ដូរមកធ្វើជាគ្រូបង្វឹកជំនួសវិញ៕