រដ្ឋបាលខេត្តកំពង់ស្ពឺ បានត្រៀមរៀបចំសង្ក្រាន្តឱ្យបានធំជាងឆ្នាំមុនៗ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងប្រព្រឹត្តិទៅនៅថ្ងៃទី១៤ ១៥និងថ្ងៃទី១៦ ខែមេសា ឆ្នាំ២០២៥នេះ ដើម្បីបង្កើនបរិយាកាសសប្បាយដល់ពលរដ្ឋក្នុងខេត្ត និងភ្ញៀវទេសចរជាតិ និង អន្តរជាតិឲ្យកាន់តែអធិកអធម។ បើយោងតាមការឱ្យដឹង រដ្ឋបាលខេត្តកំពង់ស្ពឺ គឺបាននឹងកំពុងរៀបចំលម្អភ្លើងពណ៌តាមតំបន់សំខាន់ៗក្នុងខេត្ត ដើម្បីអបអរសាទរពិធីបុណ្យចូលឆ្នាំខ្មែរ ពង្រឹងសន្តិសុខ សណ្ដាប់ធ្នាប់ អនាម័យ និងការពង្រឹងសេវាកម្មម្ហូបអាហារឱ្យកាន់តែមានភាពល្អប្រសើរ។

លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ បាននិយាយថា ដើម្បីទាក់ទាញភ្ញៀវទេសចរឱ្យមកសម្រាកកម្សាន្ត ក្នុងខេត្តកំពង់ស្ពឺឱ្យបានកាន់តែច្រើនបន្ថែមទៀតនោះ ក្នុងឱកាសពិធីបុណ្យចូលឆ្នាំថ្មីនេះ មន្ទីរបានរៀបចំនិងអនុវត្តន៍សកម្មភាពមួយចំនួនដូចជា ចុះពង្រឹងគុណភាពសេវាកម្ម និងផលិតផលទេសចរណ៍ តាមគោលដៅធំៗ ដែលជាគោលដៅមានភាពទាក់ទាញខ្លាំង ,ផ្សព្វផ្សាយខ្លឹមសារសារាចរណែនាំទាំង៦ចំណុច។

លោកក៏បានក្រើនរំឭកពីការរក្សាគុណភាពផលិតផល ថែរក្សាបរិស្ថាន អនាម័យ និងរក្សាតម្លៃផលិតផល សេវាកម្មឱ្យបានសមរម្យ និងចុះត្រួតពិនិត្យលើបញ្ហាតម្លៃម្ហូបអាហារ ក៏ដូចជាសេវាស្នាក់នៅផ្សេងៗ ចៀសវាងមានការឡើងថ្លៃក្នុងកំឡុងពេលពិធីបុណ្យចូលឆ្នាំថ្មីខាងមុខនេះផងដែរ៕