ករណីបាក់រលំរន្ទាដែកតភ្ជាប់ដែលជាផ្នែកមួយនៃស្ពាន Dao Khanong Expressway នៃផ្លូវល្បឿនលឿន Rama២ នៅម៉ោងប្រមាណ១៖៤៨នាទីព្រឹក ថ្ងៃសៅរ៍ ទី១៥ ខែមីនា ឆ្នាំ២០២៥ នេះ ដោយបានសម្លាប់មនុស្ស ៧នាក់ និង ២០នាក់ផ្សេងទៀតរងរបួស កំពុងបញ្ជូនទៅសង្គ្រោះបន្ទាន់។ នេះបើយោងតាមរបាយការណ៍បឋមរបស់ មន្ត្រីនគរបាល ក្នុងសង្កាត់បាងមូដ ខណ្ឌចមថុង ទីក្រុងបាងកក ប្រទេសថៃ។ ខណៈពេលនេះ អាជ្ញាធរថៃ ក៏កំពុងបន្តប្រតិបត្តិការស្វែងរក និង ជួយសង្គ្រោះ មនុស្សប្រមាណ ៣០នាក់ទៀត ដែលគេជឿជាក់ថា កំពុងជាប់នៅក្រោមគំនរបាក់បែកនៃស្ពាន ដែលបង្ខំឲ្យអាជ្ញាធរថៃ ត្រូវបិទផ្លូវទាំងស្រុងនៅបរិវេណ ជិតទីតាំងកើតហេតុ។

ស្របពេលនេះដែរ មន្ត្រីជំនាញថៃ បានកត់សម្គាល់ថា សំណង់ដែលបាក់រលំនេះ គឺមានលក្ខណៈស្រដៀងនឹងសំណង់ស្ពានដែលបានបាក់ស្រុតនៅលើផ្លូវRamaII កាលពីខែវិច្ឆិកា ២០២៤ ខណៈមូលហេតុនៃឧប្បត្តិហេតុនេះ កំពុងស្ថិតក្រោមការស៊ើបអង្កេតផងដែរ៕