រដ្ឋបាលរបស់លោក ប្រធានាធិបតី Donald Trump កាលពីថ្ងៃសុក្របានចុះហត្ថលេខាផ្តាច់ជំនួយ និង កាត់បន្ថយរបស់សហរដ្ឋអាម៉េរិក ពីទីភ្នាក់ងារសហរដ្ឋអាម៉េរិក សម្រាប់ប្រព័ន្ធផ្សព្វផ្សាយសាកលហៅកាត់ USAGM ហើយការសម្រេចនេះ បុគ្គលិកសរុបជាង១៣០០នាក់ នៃបណ្តាញព័ត៌មានរដ្ឋអាម៉េរិក Voice of America ឬ VOA ត្រូវបានដាក់ឱ្យឈប់សម្រាកពីការងារ។

ការកាត់បន្ថយដ៏ច្រើនសន្ធឹកសន្ធាប់នេះ ក៏បានលុបចោលការផ្តល់មូលនិធិសម្រាប់បណ្តាញព័ត៌មាន២ផ្សេងទៀត គឺវិទ្យុអាស៊ីសេរី និង វិទ្យុអឺរ៉ុបសេរីផងដែរ។ មួយថ្ងៃបន្ទាប់ពីនិយោជិតទាំងអស់ត្រូវបានឈប់សម្រាក បុគ្គលិកដែលធ្វើការលើមូលដ្ឋានកិច្ចសន្យាបានទទួលអ៊ីមែលជូនដំណឹងថាពួកគេត្រូវបានបញ្ឈប់នៅចុងខែមីនានេះ។ ចំពោះបុគ្គលិកពេញម៉ោងរបស់ VOA ភាគច្រើនដែលមានការការពារផ្នែកច្បាប់ច្រើនជាងនេះ មិនត្រូវបានបញ្ឈប់ភ្លាមៗនោះទេ ប៉ុន្តែនៅតែបន្តឈប់សម្រាករដ្ឋបាល ហើយត្រូវបានគេប្រាប់មិនឲ្យធ្វើការ។

លោក Liam Scott អ្នកយកព័ត៌មាន VOA បាននិយាយថា គាត់ត្រូវបានគេជូនដំណឹងថា គាត់ត្រូវបានគេបណ្តេញចេញនៅថ្ងៃទី ៣១ ខែមីនា។ លោកបានសរសេរនៅលើបណ្តាញសង្គម X ថា ការបញ្ចប់ជំនួយរបស់រដ្ឋបាល Trump មកលើ VOA និងបណ្តាញផ្សព្វផ្សាយផ្សេងទៀត គឺជាផ្នែកមួយនៃកិច្ចខិតខំប្រឹងប្រែងរបស់ខ្លួនក្នុងការរុះរើរដ្ឋាភិបាលកាន់តែទូលំទូលាយ  ប៉ុន្តែវាក៏ជាផ្នែកនៃការរំលោភបំពានរបស់រដ្ឋបាលលើសេរីភាពសារព័ត៌មាន និងប្រព័ន្ធផ្សព្វផ្សាយ៕