អ្នកស្នេហាវិស័យប្រដាល់គុនខ្មែរ មានការខឹងសម្បារយ៉ាងខ្លាំងលើកីឡាករ ធន់ ចាន់តាក់ ក្រោយរូបគេ ប្រកួតជាមួយកីឡាករបរទេស Mbang Hen Eric (Kante) លើសង្វៀនទូរទស្សន៍ CNC កាលពីថ្ងៃអាទិត្យម្សិលមិញ ដោយអ្នកលេងគុនខ្មែររូបនេះក្រោយពីចប់ទឹកបានវាយថែមកែងលើកីឡាករបរទេស ដែលរូបភាពនេះត្រូវបានមហាជនមើលឃើញថា ជាទង្វើអសីលធម៌មិនគួរកើតមានទាល់តែសោះ។

លោកឧកញ៉ា ស្រី ចាន់ថន អនុប្រធានសហព័ន្ធគុនខ្មែរអន្តរជាតិ និងជាស្ថាបនិកក្លឹបគុនខ្មែរអន្តរជាតិ Kun Khmer International Fight (KKIF) បានប្រតិកម្មភ្លាមៗទៅលើកីឡាករធន់ ចាន់តាក់ ដោយតម្រូវឲ្យកីឡាកររូបនេះត្រូវសុំទោសកីឡាករបរទេសស្បែកខ្មៅដល់ក្លឹបហ្វឹកហាត់។

យ៉ាងណាមិញកាលពីព្រឹកថ្ងៃទី១៧ ខែមីនា ឆ្នាំ២០២៥ អ្នកលេងគុនខ្មែរដើមកំណើតខេត្តកំពង់ឆ្នាំង ធន់ ចាន់តាក់ បានភ្ជាប់ជាមួយផ្លែឈើមួយកន្រ្តក ដើម្បីទៅសុំទោសកីឡាករបរទេស Kante ដែលកំពុងហ្វឹកហាត់នៅក្លឹបហ្វឹកហាត់ KKIF ដោយបានសរសេសំណេរសុំទោសនៅលើទំព័រហ្វេសបុករបស់ខ្លួនថាយ៉ាងដូច្នេះថា “ខ្ញុំបាទ ធន់ ចាន់តាក់ ស្អែកនេះខ្ញុំនឹងទៅសុំទោស Kante ដល់ក្លិប ហើយខ្ញុំសង្ឃឹមថាបងប្អូននិងអធ្យាស្រ័យដល់ខ្ញុំបាទផង”។

គួរបញ្ជាក់ថា អ្នកលេងគុនខ្មែរជង្គង់ពិស ធន់ ចាន់តាក់ ធ្លាប់ប្រកួតលើសង្វៀនសរុបចំនួន ១២១ដង គឺឈ្នះ ៩១ដង ចាញ់ ២៧ដង ស្មើរចំនួន០៣សង និងផ្ដួលដៃគូរប្រកួតអោយសន្លប់តាមលក្ខណៈបច្ចេកទេសចំនួន ៤៥ដង ជាកូនសិស្សរបស់លោកគ្រូ ធន់ សុភា ខណៈ Mbang Hen Eric (Kante) មានប្រវត្តិប្រកួតលើសង្វៀនចំនួនតែ ៤៦ដងតែប៉ុណ្ណោះ៕