លោកប្រធានាធិបតី Donald Trump បាននិយាយថា លោកនឹងនិយាយទៅកាន់ប្រធានាធិបតីរុស្ស៊ីលោក Vladimir Putin នៅថ្ងៃអង្គារនេះ ខណៈដែលលោកជំរុញឱ្យបញ្ចប់សង្រ្គាមនៅអ៊ុយក្រែន។ មេដឹកនាំអាម៉េរិកបានបង្ហាញការសន្ទនានាពេលខាងមុខដល់អ្នកយកព័ត៌មានពេលកំពុងហោះហើរពីរដ្ឋ Florida ទៅ Washington តាមយន្តហោះ Air Force One នៅល្ងាចថ្ងៃអាទិត្យ។

លោក Trump បន្តថា យើងនឹងមើលថាតើយើងមានអ្វីត្រូវប្រកាសប្រហែលនៅថ្ងៃអង្គារ។ ខ្ញុំនឹងនិយាយទៅកាន់ប្រធានាធិបតី Putin នៅថ្ងៃអង្គារនេះ។  យើងចង់ឃើញថា តើយើងអាចធ្វើឲ្យសង្គ្រាមនោះបញ្ចប់ឬអត់។ លោក Trump បាននិយាយថា ដី និងរោងចក្រថាមពលគឺជាផ្នែកមួយនៃការសន្ទនាជុំវិញការធ្វើឱ្យសង្រ្គាមឈានដល់ទីបញ្ចប់។

ការសន្ទនាបែបនេះអាចជាចំណុចស្នូលនៅក្នុងជម្លោះ និងជាឱកាសសម្រាប់លោក Trump ដើម្បីបន្តតម្រង់ទិសគោលនយោបាយការបរទេសរបស់អាម៉េរិកឡើងវិញ។ សម្ព័ន្ធមិត្តនៅអឺរ៉ុបមានការប្រុងប្រយ័ត្នចំពោះទំនាក់ទំនងរបស់លោក Trump ចំពោះលោក Putin និងជំហររឹងរូសរបស់លោកចំពោះប្រធានាធិបតីអ៊ុយក្រែនលោក Volodymyr Zelenskyy ដែលបានប្រឈមមុខនឹងការរិះគន់យ៉ាងខ្លាំងនៅពេលគាត់បានទៅជួបពិភាក្សានៅការិយាល័យរៀងពងក្រពើជាងពីរសប្តាហ៍មុន។ ថ្វីបើរុស្ស៊ីបរាជ័យក្នុងគោលដៅដំបូងរបស់ខ្លួនក្នុងការផ្តួលរំលំអ៊ុយក្រែនដោយការឈ្លានពានរបស់ខ្លួនកាលពីបីឆ្នាំមុនក៏ដោយ ក៏ខ្លួននៅតែគ្រប់គ្រងតំបន់ដ៏ធំនៃប្រទេសនេះ៕