ស្រ្តីរងគ្រោះក្នុងហេតុការណ៍គ្រោះថ្នាក់ចរាចរណ៍ដ៏រន្ធត់នៅលើផ្លូវ ៦០ម៉ែត្រ ដែលបណ្ដាលឲ្យប្ដី និងកូនប្រុសស្រី បានបាត់បង់ជីវិតកាលពីជាង ២ខែកន្លងទៅនេះ ឯស្រ្ដីជាម្ដាយបានរងរបួសធ្ងន់សម្រាក់ព្យាបាលនៅឯក្រៅប្រទេស នាពេលថ្មីៗនេះស្រ្ដីរងគ្រោះរូបនេះបានបង្ហោះសំណេរមួយក្នុងបណ្ដាញសង្គមបញ្ជាក់ថាមកទល់ពេលនេះខ្លួននៅមិនទាន់ទទួលបានសំណងពីជនបង្កដែលបើកបរក្នុងស្ថានភាពស្រវឹងជោគជាំនោះនៅឡើយ។

នេះបើយោងតាមការបង្ហោះរបស់ នារីរងគ្រោះ មានគណនីឈ្មោះ Non Leakna បានរៀបរាប់ទាំងក្ដុកក្ដួលថា៖ «ប្ដីហើយនឹងកូនៗជាទីស្រលាញ់របស់ខ្ញុំបានលាចាកពីលោកនេះទៅជិត ៣ខែហើយ ចាប់តាំងពីថ្ងៃកើតហេតុទី១០ ខែមករា ឆ្នាំ២០២៥ រហូតមកដល់ថ្ងៃនេះនាងខ្ញុំមិនទាន់ទទួលបានសំណងអ្វីនៅឡើយទេជិត ៣ខែហើយ ខាងតុលាការកោះហៅឡើងរហូតតែមកដល់ថ្ងៃនេះមិនទាន់មានដំណឹងនៅឡើយទេ មិនដឹងថាពេលណាទើបបានសំណងខ្លះដើម្បីយកទៅបន្តការព្យាបាល នឹងយកទៅសងគេទេកុំតែបានលើបងប្អូនទាំងអស់គ្នាជួយទេ កុំអីខ្ញុំមិនដឹងថាមានជីវិតរស់នៅបន្តឫអត់ទេ»។

ក្រោយពីបានឃើញបែបនេះហើយ ក៏មានមហាជនជាច្រើនបានចូលទៅស៊ែរចែករំលែកតៗគ្នា និងលើកទឹកចិត្តដល់រូបគាត់ឲ្យព្យាយាមតស៊ូជំនះនូវរឿងរ៉ាវដល់ឈឺចាប់មួយនេះផងដែរ៕

សម្រួលដោយ៖ Sun Darasy