អតីតចៅហ្វាយខេត្ត An Giang ត្រូវបានកាត់ទោសឲ្យជាប់ពន្ធនាគារកាលពីថ្ងៃពុធពីបទទទួលសំណូកចំនួន ៣០០,០០០ ដុល្លារអាម៉េរិក និងអនុញ្ញាតឲ្យក្រុមហ៊ុនមួយជីកខ្សាច់ដោយខុសច្បាប់។ តុលាការ​ប្រជាជន​ទីក្រុង​ហូជីមិញ​បាន​កាត់ទោស​លោក Nguyen Thanh Binh ឲ្យ​ជាប់​ពន្ធនាគារ ៨ ឆ្នាំ​កន្លះ។

ចៅក្រមបាននិយាយថា លោកបានណែនាំមន្ត្រីក្រោមឱវាទរបស់ខ្លួនឲ្យអនុញ្ញាតឲ្យក្រុមហ៊ុន Trung Hau 68 បូមខ្សាច់ដោយមិនឆ្លងកាត់ដំណើរការដេញថ្លៃ ដែលនាំឲ្យខេត្តនេះខាតបង់ជិត ២៩៤ ពាន់លានដុង (១១.៤៧ លានដុល្លារអាម៉េរិក)។ ប្រធានក្រុមហ៊ុន Le Quang Binh ក៏បានផ្តល់ប្រាក់ចំនួន ៩៦១ លានដុង ដល់ជំនួយការចៅហ្វាយខេត្ត លោក Tran Anh Thu និង ៣,១ ពាន់លានដុង ជូនលោក Nguyen Viet Tri ប្រធាននាយកដ្ឋានធនធានធម្មជាតិ និងបរិស្ថានផងដែរ។

លោក Binh ត្រូវបានកាត់ទោសឲ្យជាប់ពន្ធនាគារ ១៣ ឆ្នាំពីបទស៊ីសំណូក ៦ ឆ្នាំពីបទរំលោភលើបទប្បញ្ញត្តិស្តីពីការស្រាវជ្រាវ ការរុករក និងកេងប្រវ័ញ្ចធនធាន និង ១២ ឆ្នាំពីបទលាងលុយកខ្វក់។ រយៈពេល ៣០ ឆ្នាំដែលគាត់ទទួលបានគឺជារយៈពេលអតិបរមានៅក្នុងប្រទេសវៀតណាមបន្ទាប់ពីការកាត់ទោសអស់មួយជីវិត៕