​ប៉ូលិសបាននិយាយថា មនុស្សចំនួន ៤៧ នាក់ ដែលភាគច្រើនជាជនបរទេសបានរងរបួសកាលពីថ្ងៃសៅរ៍ បន្ទាប់ពីរថយន្តក្រុងទេសចរណ៍មួយបានបុកពីក្រោយរថយន្តមួយគ្រឿងទៀត ខណៈដែលរថយន្តទាំងពីរកំពុងធ្វើដំណើរស្របផ្លូវជាមួយគ្នានៅលើផ្លូវល្បឿនលឿនមួយនៅភាគខាងលិចទីក្រុងតូក្យូ។

ហេតុការណ៍នេះបានកើតឡើងនៅម៉ោងប្រហែល ១០៖១៥ នាទីព្រឹកម៉ោងក្នុងស្រុកនៅជិតមាត់ផ្លូវរូងក្រោមដី Kobotoke នៅលើផ្លូវ Chuo Expressway ក្នុង Hachioji។ បន្ទាប់ពីមានការប៉ះទង្គិចគ្នាគ្មានជនរងគ្រោះណាម្នាក់មានគ្រោះថ្នាក់ដល់អាយុជីវិតនោះទេ ។ រថយន្តក្រុងនេះ បានចាកចេញពីស្ថានីយ៍ JR Tokyo ហើយកំពុងធ្វើដំណើរទៅកាន់បឹង Kawaguchi ក្នុងខេត្ត Yamanashi ដែលនៅជិតខាង។

តាម​សមត្ថកិច្ច​បាន​ឲ្យ​ដឹង​ថា រថយន្តក្រុង​ដែល​បើក​ដំណើរការ​ដោយ​ក្រុមហ៊ុន​ដដែល​បាន​​រំកិលតិចៗ នងឈប់​ដោយសារ​ចរាចរណ៍ ហើយ​គ្រោះថ្នាក់​នេះ​កើតឡើង​ដោយ​អ្នកបើកបរ​រថយន្តក្រុង​ខាងក្រោយ​មិន​បាន​ចាប់អារម្មណ៍​ថា​រថយន្ត​ខាងមុខ​បាន​ជាន់​ហ្វ្រាំង​។ ប្រតិបត្តិករ Central Nippon Expressway Co. បាននិយាយថា ឧបទ្ទវហេតុនេះបាននាំឲ្យមានការបិទជាបណ្តោះអាសន្ននៃផ្លូវចេញក្រៅរវាងផ្លូវប្រសព្វ Hachioji និងផ្លូវបំបែក Sagamiko៕