សពជនរងគ្រោះ៣នាក់បន្ថែមទៀតដែលជាប់នៅខាងក្នុងអគារការិយាល័យសវនកម្មរដ្ឋដែលបានដួលរលំនៅក្នុងសង្កាត់ Chatuchak ទីក្រុងបាងកក ត្រូវបានក្រុមមន្ត្រីរកឃើញនៅព្រឹកព្រលឹមថ្ងៃអាទិត្យ។ប្រតិបត្តិការរុះរើអគារ ៣០ ជាន់ និងជួយសង្គ្រោះជនរងគ្រោះដែលនៅសេសសល់បានឈានចូលដល់ថ្ងៃទី ១០ហើយបន្ទាប់ពីការដួលរលំដោយសារតែការរញ្ជួយដីកាលពីថ្ងៃទី ២៨ ខែមីនា។

នៅម៉ោង ៧ យប់ថ្ងៃសៅរ៍ ក្រុមមន្ត្រីនៅនឹងកន្លែងបានដាក់ពង្រាយគ្រឿងចក្រធុនធ្ងន់ដើម្បីរុះរើរចនាសម្ព័ន្ធដែក ដោយបន្តប្រតិបត្តិការរហូតដល់ម៉ោង ១២ ព្រឹកថ្ងៃអាទិត្យ។ ក្នុង​អំឡុង​ពេលប្រតិបត្តិការ គេ​បាន​រក​ឃើញ​ម្រាម​ដៃ​ដាច់​មួយ​នៅ​តំបន់ C ។ ទោះបីជាយ៉ាងណាក៏ដោយ នៅវេលាម៉ោង ១៖០៥ នាទីព្រឹក ក្រុមមន្ត្រីបានបញ្ជាឲ្យដកខ្លួនចេញជាបណ្តោះអាសន្ន បន្ទាប់ពីមានការបាក់រលំសំណង់នៅតំបន់ B ។

រថយន្តសង្គ្រោះរបស់មូលនិធិ Ruamkatanyu បានដឹកសពជនរងគ្រោះទាំង២នាក់ ដែលជាប់ក្នុងនោះមានម្នាក់ជាប្រុស និងម្នាក់ទៀតមិនទាន់ស្គាល់អត្តសញ្ញាណ ភេទ ទៅកាន់វិទ្យាស្ថានកោសល្យវិច្ច័យនៃមន្ទីរពេទ្យ General Police ដើម្បីធ្វើកោសល្យវិច័យ និងកំណត់អត្តសញ្ញាណ។

ប្រតិបត្តិការ​បាន​បន្ត​ឡើង​វិញ ខណៈ​គ្រឿង​ជីក​កកាយ​ត្រូវ​បាន​ដាក់​ពង្រាយ​នៅ​ក្នុង​តំបន់ B ដែល​មាន​ជន​រង​គ្រោះ​បន្ថែម​ទៀត​ត្រូវ​បាន​គេ​ជឿ​ថា​ជាប់​នៅ​ក្នុង​ដី។ នៅ​ម៉ោង​៥​ព្រឹក ក្រុម​សង្គ្រោះ​ដែល​អម​ដោយសត្វសុនខ K9 បាន​រក​ឃើញ​សព​ជន​រង​គ្រោះ​នៅ​តំបន់ C ។ គិតត្រឹមថ្ងៃអាទិត្យនេះ ចំនួនអ្នកស្លាប់ក្រៅផ្លូវការពីការដួលរលំអគារបានកើនឡើងដល់ ១៦ នាក់ហើយ។ ក្រុមមន្ត្រីកំពុងបន្តស្វែងរកមនុស្ស ៧៨ នាក់ដែលត្រូវបានគេជឿថាជាប់នៅខាងក្នុង៕