មន្ត្រីជួយសង្គ្រោះបានអះអាងនៅថ្ងៃអង្គារនេះថា សព០៣នាក់ទៀត ត្រូវបានរកឃើញពីគំនរបាក់បែកនៃអគារកម្ពស់ ៣០ជាន់ដែលដួលរលំនៅក្នុងសង្កាត់ Chatuchak នៃទីក្រុងបាងកក ដែលនាំឲ្យចំនួនអ្នកស្លាប់កើនឡើងដល់ ២០នាក់។

គិតត្រឹមព្រឹកថ្ងៃអង្គារនេះ មនុស្សចំនួន ៧៧ នាក់នៅតែបាត់ខ្លួន ខណៈអគារការិយាល័យសវនកម្មរដ្ឋដែលកំពុងសាងសង់ (SAO) បានដួលរលំកាលពីថ្ងៃទី ២៨ ខែមីនា បន្ទាប់ពីផលប៉ះពាល់នៃការរញ្ជួយដីកម្រិត ៨.២ រ៉ិចទ័រនៅជិតទីក្រុង Mandalay ប្រទេសមីយ៉ាន់ម៉ា ដែលមានចម្ងាយប្រហែល៣៩២ គីឡូម៉ែត្រពីខេត្ត Mae Hong Son របស់ប្រទេសថៃ។

មន្ត្រីដដែលបាននិយាយថា សពចុងក្រោយបំផុតទាំង៣ត្រូវបានរកឃើញនៅក្នុងតំបន់ B និង C បន្ទាប់ពីមន្ត្រីបានសម្អាតកំទេចកំទី ហើយបានធ្លាក់ចូលទៅក្នុងរណ្តៅជម្រៅ ៤ ម៉ែត្រ។ លោកបានបន្ថែមថា សពជនរងគ្រោះនឹងត្រូវបានបញ្ជូនទៅកាន់វិទ្យាស្ថានកោសល្យវិច្ច័យនៅមន្ទីរពេទ្យបង្អែកប៉ូលិសដើម្បីធ្វើកោសល្យវិច័យ។ ប្រតិបត្តិការជួយសង្គ្រោះនៅតែបន្ត ខណៈកិច្ចខិតខំប្រឹងប្រែងក្នុងការរកឃើញកម្មករបាត់ខ្លួនទាំង៧៧នាក់កំពុងដំណើរការ៕