នៅវេលាម៉ោង៦ព្រឹកថ្ងៃទី១១ ខែមេសា ឆ្នាំ២០២៥នេះស្ពានលេខ២៨ បច្ចុប្បន្នជាស្ពានខ្ពស់ជាងគេនៅកម្ពុជានៃគម្រោងផ្លូវជាតិលេខ១០ បើកឲ្យប្រជាពលរដ្ឋឆ្លងកាត់បណ្តោះអាសន្នរយៈពេល៧ថ្ងៃ ចាប់ពីថ្ងៃនេះរហូតដល់ថ្ងៃទី១៧ ខែមេសា ឆ្នាំ២០២៥ គឺមុននិងអំឡុងពេលពិធីបុណ្យចូលឆ្នាំថ្មី ប្រពៃណីជាតិខ្មែរ។

បើតាមការបញ្ជាក់ពីអ្នកនាំពាក្យក្រសួងសាធារណការនិងដឹកជញ្ជូន ឯកឧត្តម ផន រឹម នាព្រឹកនេះបានឲ្យដឹងថា ក្នុងការបើកដំណើរការជាបណ្តោះអាសន្ននេះ ជាជំហានដំបូងអនុញ្ញតសម្រាប់តែរថយន្តគ្រួសារ និងម៉ូតូចាប់ពីម៉ោង៦:០០ព្រឹក ដល់ម៉ោង ១៨:០០ល្ងាច តែមិនអនុញ្ញាត្តិឲ្យឈប់យានយន្តលើស្ពានជាដាច់ខាតដើម្បីធានាសុវត្ថិភាព។ ដោយឡែកចំពោះរថយន្តដឹកអីវ៉ាន់ និងរថយន្តធំៗត្រូវបន្តប្រើប្រាស់ផ្លូវវាងដដែល។ ជាមួយគ្នានេះឯកឧត្តមអ្នកនាំពាក្យក៏បានបញ្ជាក់ថា ក្រោយពេលបញ្ចប់ការបើកឱ្យប្រជាពលរដ្ឋឆ្លងកាត់បណ្តោះអាសន្នរយៈពេល៧ថ្ងៃ យើងនឹងបិទចរាចរណ៍លើស្ពានមួយរយៈទៀត (បន្តប្រើផ្លូវវាង)ដើម្បីឱ្យការដ្ឋានបង្ហើយកិច្ចការរបស់ខ្លួនដូចជា៖ ដាក់បង្កាន់ដៃ, អ៊ុតAC, គូសគំនូសចរាចរណ៍, បំពាក់ផ្លាកសញ្ញាចរាចរណ៍ និងកិច្ចការការបន្ទាប់មន្សំមួយចំនួនទៀត។

សូមបញ្ជាក់ដែរថា ស្ពានខ្ពស់ជាងគេនៅកម្ពុជាដែលមានកម្ពស់៩០ម៉ែត្រ ទទឹង១០ម៉ែត្រ និងប្រវែងសរុប ៥៣៧ម៉ែត្រ ស្ថិតក្នុងគម្រោងខ្សែផ្លូវជាតិលេខ១០នេះ គឺជាស្ពានលេខ២៨ ស្ថិតក្នុងភូមិសាស្រ្តភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ ដែលបានប្រើប្រាស់ថវិកាជាតិសរុបប្រមាណ ២៥លានដុល្លារអាម៉េរិក ។