អ្នកដំណើរតាមទូកល្បឿនលឿន យ៉ាងតិច៨៧នាក់ បានរងរបួស បន្ទាប់ពីទូកបានបុកជាមួយ សត្វត្រីបាឡែន ដ៏ធំមួយក្បាលកាលពីថ្ងៃទី៩ ខែមីនា ស្ថិតនៅប្រទេសជប៉ុន ។

ឆ្មាំការពារដែនសមុទ្រជប៉ុន បានអះអាងថា មនុស្ស៥នាក់ រងរបួសធ្ងន់ នៅក្នុងហេតុការណ៍នេះ ។ ទូកល្បឿនលឿន ដឹកអ្នកដំណើរ មកដល់ដែនកោះ Sado ក្រោយដំណើរវិលត្រឡប់ពីដីគោក ក៏ជួបហេតុការណ៍តែម្តង ។

សារព័ត៌មាន NHK ដកស្រង់ប្រភពព័ត៌មានពីអ្នកជំនាញសត្វក្នុងទឹក បញ្ជាក់ថា វាទំនងជាទូកល្បឿនលឿននេះ បើកបុកជាមួយសត្វត្រី ប៉ាឡែន មួយក្បាល ។ ត្រីបាឡែន ពីរក្បាល ឈ្មោះ humpbacks និង minkes ជាញឹកញាប់បង្ហាញខ្លួននៅទីកន្លែងកើតហេតុនេះ ។

អ្នកដំណើរក្នុងហេតុការណ៍នេះម្នាក់និយាយប្រាប់ថា «វាបានប៉ះទង្គិចជាមួយអ្វីម្យ៉ាងដ៏ធំ» ។ អ្នកដំណើរម្នាក់របួសហូរឈាម ។

ខ្នងទូកមានការខូចខាត ។ ប៉ុន្តែទោះបីយ៉ាងណា អ្នកដំណើរទាំង១២១នាក់ និងនាវិក៤នាក់ដែលនៅលើទូកល្បឿនលឿននេះ បានទៅដល់គោលដៅរបស់ខ្លួន ដោយគ្មានជំនួយពីខាងក្រៅនោះទេ ៕