យន្តហោះចិន C919 និង ARJ21 ដែលត្រូវបានអភិវឌ្ឍដោយក្រុមហ៊ុន Commercial Aircraft Corporation of China, Ltd. (COMAC) បានមកដល់ប្រទេសកម្ពុជាហើយ កាលពីថ្ងៃអង្គារ សម្រាប់ធ្វើការហោះហើរបង្ហាញសមត្ថភាព នៅប្រទេសអាស៊ានចំនួន៥ ដើម្បីព្យាយាមពង្រីកការលក់ទៅកាន់ទីផ្សារអន្តរជាតិ។

យន្តហោះទាំងពីរនេះ បានហោះហើរពីសិង្ហបុរី ទៅកាន់ប្រទេសវៀតណាម និងឡាវ ហើយបន្ទាប់មកមកកាន់ប្រទេសកម្ពុជា បន្ទាប់ពីបានបញ្ចប់ការតាំងពិព័រណ៍ Singapore Airshow ឆ្នាំ២០២៤ ជាកន្លែងដែលពួកគេបានបង្ហាញខ្លួនជាលើកដំបូងនៅក្រៅប្រទេសចិន។ យន្តហោះដឹកអ្នកដំណើរនេះ ជាប្រភេទ narrow-body ត្រូវបានអះអាងថា គឺជា​គូប្រជែងសម្រាប់យន្តហោះ 737 MAX របស់ក្រុមហ៊ុនអាមេរិក Boeing ហើយនិងយន្តហោះ​ A320neo របស់ក្រុមហ៊ុនអឺរ៉ុប Airbus។ ចំណែកឯ យន្តហោះ ARJ21 វិញ គឺជាយន្តហោះដឹកអ្នកដំណើរ មានទំហំតូចជាង C919 ហើយប្រើប្រាស់ជាចម្បងនៅក្នុងប្រទេសចិនផ្ទាល់ ប៉ុន្តែយន្តហោះនេះ ក៏មានធ្វើប្រតិបត្តិការនៅអាកាសចរណ៍មួយរបស់ឥណ្ឌូណេស៉ី។

គួរបញ្ជាក់ថា បើតាមការឲ្យដឹងពីក្រុមហ៊ុន COMAC ផ្ទាល់ គោលបំណងចម្បងនៃការហោះហើរយន្តហោះ C919 និង ARJ21 នៅប្រទេសអាស៊ានទាំង៥ គឺដើម្បីបង្ហាញពីសមត្ថភាពដ៏ល្អ នៃយន្តហោះដឹកអ្នកដំណើរទាំងពីរនេះ ហើយដាក់ចេញនូវមូលដ្ឋានគ្រឹះ សម្រាប់ការពង្រីក​ទីផ្សារនាពេលអនាគត នៅក្នុងតំបន់អាស៊ីអាគ្នេយ៍។ ជារួម រហូតមកទល់បច្ចុប្បន្ន យន្តហោះដឹកអ្នកដំណើរនេះ ទទួលបានការបញ្ជាទិញច្រើនជាង១,០០០គ្រឿងហើយ ប៉ុន្តែភាគច្រើនគឺធ្វើឡើងពីសំណាក់ក្រុមហ៊ុនអាកាសចរណ៍ចិន និងក្រុមហ៊ុនផ្តល់សេវាកម្មជួលយន្តហោះ៕