ខេត្តសៀមរាប ៖ ផ្ទះចំនួន២ខ្នងដែលសាងសង់លើដីចំណីផ្លូវ ត្រូវអគ្គីភ័យលេបត្របាក់ទាំងស្រុងកាលពីព្រឹកព្រលឹមថ្ងៃទី៥ ខែមេសា នេះ ដោយបន្សល់តែគំនរផេះផង់ប៉ុណ្ណោះ។

តាមសមត្ថកិច្ចបានឲ្យដឹងថា ហេតុការណ៍អគ្គីភ័យនេះបណ្តាលឲ្យរងការខូចខាត ផ្ទះចំនួន២ខ្នងផ្ទះ ក្នុងនោះ ១-ផ្ទះរបស់ឈ្មោះ ឈា ដាវី ភេទស្រី អាយុ៥០ឆ្នាំ មុខរបរលក់ដូរ ខូចខាតផ្ទះធ្វើអំពីថ្មប្រក់ស័ង្កសី ទំហំ ប្រវែង០៥x១០m ម៉ូតូមួយគ្រឿងម៉ាកសង់០១៥ ពណ៌ខ្មៅ, លុយដុល្លារ ១០០០ដុល្លារ លុយខ្មែរ១៨លានរៀល, តុសាឡុងឈើមួយឈុត,គ្រែដេកចំនួន៣, ពួក២, កៅអីតុក្កតា ២០, ទូដាក់ខោអាវចំនួន៣, ទូរទស្សន៍២គ្រឿង ខោអាវ+ឯកសារ និងសម្ភារៈប្រើប្រាស់មួយចំនួន សរុបជាទឹកប្រាក់ប្រហែល១៣៥០០ដុល្លារ។

ផ្ទះទី២របស់ឈ្មោះ ប៉ាត សូត្រ ភេទស្រី អាយុ៦៧ឆ្នាំ មុខរបរលក់ដូរ ខូចខាតផ្ទះធ្វើអំពីឈើលើ ថ្មក្រោមប្រក់ស័ង្កសី ទំហំប្រវែង០៦x០៩ម៉ែត្រ ទូរដាក់ខោអាវចំនួន ០២, ម៉ាស៊ីនដេរចំនួន០៣គ្រឿង, ធុងទឹកកកធំចំនួន០១, ខោអាវឯកសារ និងសម្ភារៈប្រើប្រាស់ផ្សេងៗមួយចំនួន សរុបជាទឹកប្រាក់ប្រហែល២៥០០ដុល្លារ។

យ៉ាងណាក៏ដោយ អគ្គិភ័យនេះបានរលត់ទៅវិញនៅវេលាម៉ោង៦ព្រឹក ក្រោយមានការអន្តរាគមន៍ពីរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តសៀមរាប ដោយប្រើប្រាស់ទឹកអស់ចំនួន៤ឡាន។

ចំពោះមូលហេតុដែលបណ្តាលឲ្យកើតមានគ្រោះអគ្គិភ័យនេះ គឺបណ្ដាលមកពីឆ្លងចរន្តអគ្គិសនី៕ ជា ស្រស់