រាជធានីភ្នំពេញ៖ បុរសម្នាក់បានស្លាប់ភ្លាមៗនៅនឹងកន្លែង ខណៈកំពុងជិះម៉ូតូ ហើយក៏ត្រូវរថយន្តធុនធំបុកពេញទំហឹងបណ្ដាលឲ្យស្លាប់ភ្លាមៗនៅកន្លែងកើតហេតុ។ ករណីនេះបានកើតឡើងកាលពីវេលាម៉ោងប្រមាណ៩យប់ ថ្ងៃទី១១ ខែមេសា ឆ្នាំ២០១៩ នៅលើកំណាត់ផ្លូវមហាវិថីឈ្នះឈ្នះ កែងស្តុបផ្លូវមហាវិថីហានណូយ ផ្លូវលេខ១៩១៩ ចំណុចភូមិអន្លុងក្ងាន សង្កាត់ឃ្មួញ ខណ្ឌសែនសុខ។

តាមសេចក្តីរាយការណ៍ថា មុនពេលកើតហេតុគេឃើញបុរសម្នាក់ បើកម៉ូតូមួយគ្រឿងពាក់ស្លាកលេខ ភ្នំពេញ 1HF-6766 បើកបរលើផ្លូវមហាវិថីឈ្នះ ឈ្នះក្នុងទិសដៅពីលិចទៅកើត លុះមកដល់ស្ដុប ស្រាប់តែមានរថយន្តសណ្តោងរម៉កមួយគ្រឿងពាក់ស្លាកលេខភ្នំពេញ 3C-2628 បើកដោយបុរសម្នាក់បើកឆ្លងផ្លូវហាណូយឆ្ពោះទៅផ្លូវមហាវិថីឈ្នះ ឈ្នះ ក្នុងទិសដៅពីត្បូងទៅជើងក្នុងល្បឿនលឿន ក៏ជ្រុលទៅបុកម៉ូតូជនរងគ្រោះបណ្ដាលឲ្យបោកក្បាលផ្ទប់នឹងផ្លូវស្លាប់ភ្លាមៗ, បន្ទាប់មកម្ចាស់រថយន្តក៏ចុះគេចបាត់ស្រមោល ដោយទុករថយន្តនៅកន្លែងកើតហេតុ។

ក្រោយពេលកើតហេតុសមត្ថកិច្ចខណ្ឌសែនសុខបានសការណ៍ជាមួយចរាចរណ៍ក្រុងចុះមកវាស់វែងនៅកន្លែងកើតហេតុ និងប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី៕ សុភាព