ដោយសារតែការដាក់ទណ្ឌកម្មពីសហគមន៍អន្តរជាតិ ធ្វើឲ្យការទិញ រថយន្ត Mercedes-Benz​ សម្រាប់មេដឹកនាំ គីម ជុងអ៊ុន ប្រើប្រាស់ មិនមែនជារឿងងាយស្រួលនោះឡើយ គឺត្រូវឆ្លងកាត់ដល់ទៅ​៦ប្រទេសទម្រាំទៅដល់ទីក្រុងព្យុងយ៉ាង។

តាមព័ត៌មានស្រាវជ្រាវ របស់មជ្ឈមណ្ឌល ស្រាវជ្រាវ ការពារជាតិ​ នៅទីក្រុងវ៉ាស៊ីនតោន បានបញ្ជាក់ថា មាន​ប្រទេសដល់ទៅ​៩០ ប្រទេស​ជាប់ពាក់ព័ន្ធ និងការទិញទំនិញប្រណិតៗឲ្យទៅកូរ៉េខាងជើង ចាប់ពីឆ្នាំ​២០១៥-២០១៧ ក្នុងនោះមានរថយន្តពាសដែក​Mercedes-Benz ពីរគ្រឿង ដែល គីមជុង អ៊ុន កំពុងតែប្រើប្រាស់។

សារព័ត៌មាន​ យ៉ុនហាប់​របស់កូរ៉េខាងត្បូង បានផ្សាយថា រថយន្ត​ Mercedes-Benz​ S-600 Guard បានដឹកជញ្ជូនពី ហុល្លង់ ឆ្លងកាត់ប្រទេសចិន កូរ៉េខាងត្បូង ជប៉ុន និងរុស្ស៊ី​ទើបទៅដល់ កូរ៉េខាងជើង ។ ការដឹកជញ្ជូន បែបនេះគឺដើម្បីគេចពីការដាក់ទណ្ឌកម្ម​របស់អង្គការសហប្រជាជាតិ ​។ ក្រុមអ្នកស្រាវជ្រាវអាមេរិក បានតាមដាន​តាំងពីប្រភពចាប់ផ្តើម​នៃការនាំចេញ​រថយន្តlimousine ពាសដែល ម៉ាក​Mercedes ថ្មីបំផុត សម្រាប់លោក គីម ជុង អ៊ុន គឺចាប់ផ្តើមចេញពី​កំពង់ផែ​ទីក្រុង​ Rotterdam ​ប្រទេសហុល្លង់នៅខែមិថុនាឆ្នាំ​២០១៨។​

ក្រោយរយៈពេល​៤១ថ្ងៃនៅលើដែនសមុទ្រ រថយន្តខាងលើក៏បានទៅដល់​ប្រទេសចិន ហើយនៅទីនោះចាប់ពីថ្ងៃទី​៣១ខែកក្កដា​ដល់ថ្ងៃទី​២៨ខែសីហា ​។ ក្រោយមកកុងតឺន័រដាក់ រថយន្ត​ បានបញ្ជូនបន្តទៅកាន់នាវាមួយទៀតទៅទីក្រុងអូសាកាប្រទេសជប៉ុន ហើយបន្ត​ប្តូនាវាឡើងទៅកាន់ទីក្រុង Busan កូរ៉េខាងត្បូង ចំណាយពេល​៣ថ្ងៃទៀត ។ក្រោយមក ក៏បានបន្តដឹកជញ្ជូនតាមនាវាបំពាក់ទង់ជាតិ  Togo ឆ្ពោះទៅកាន់​ប្រទេសរុស្ស៊ី ហើយក៏បាត់ខ្លួននៅក្នុងប្រទេសរុស្ស៊ីតែម្តង ​។ក្រោយមកទើបលេចមុខនៅទីក្រុងព្យុងយ៉ាង នាខែមករាឆ្នាំ​២០១៩។ រថយន្តនោះមានតម្លៃប្រមាណ​៥០ម៉ឺនដុល្លារ ប៉ុន្តែការដឹកជញ្ជូនចុះឡើងធ្វើឲ្យតម្លៃកើនឡើងខ្ពស់ថែមទៀត​៕MEO085