រាជធានីភ្នំពេញ៖ រថយន្តកុងទីន័រធុនធំមួយគ្រឿង បានក្រឡាប់ផ្ងារជើងច្រង៉ាងនៅលើផ្លូវថៃហ្គ័រ កែងនិងផ្លូវជាតិលេខ១ ស្ថិតក្នុងភូមិតាព្រហ្ម សង្កាត់ព្រែកឯង ខណ្ឌច្បារអំពៅ កាលពីវេលាម៉ោង ០៣រំលងអធ្រាត្រ ឈានចូលថ្ងៃទី៥ ខែសីហា ឆ្នាំ២០១៩ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេឃើញរថយន្តកុងទីន័រមួយគ្រឿង ក្បាលពណ៌ខៀវចាស់ ពាក់ស្លាកលេខ ភ្នំពេញ 3C-0795 បានធ្វើដំណើរតាមបណ្ដោយផ្លូវជាតិលេខ១ ទិសដៅពីកើតទៅលិច ក្នុងល្បឿនលឿន។ ខណៈមកដល់ចំណុចផ្លូវថៃហ្គ័រ បានបួងចង្កូតមកខាងឆ្វេងដៃយ៉ាងលឿន ក៏បណ្ដាលឲ្យរថយន្តក្រឡាប់ផ្ងារជើងឡើងច្រង៉ាងតែម្ដង ធ្វើឲ្យរថយន្តនិងសម្ភារៈមួយចំនួន រងការខូចខាតយ៉ាងដំណំ។

ក្នុងករណីគ្រោះថ្នាក់ចរាចរណ៍ខាងលើនេះ មិនបណ្ដាលឲ្យមានមនុស្សរងរបួសឡើយ។ ចំណែកតៃកុងរថយន្តបង្ក បានគេចខ្លួនបាត់ដោយបន្សល់ទុករថយន្ត នៅកន្លែងកើតហេតុ។

ក្រោយកើតហេតុ សមត្ថកិច្ចមូលដ្ឋានបានចុះទៅដល់ រួចទាក់ទងទៅជំនាញចរាចរណ៍ក្រុង ឲ្យមកធ្វើការវាស់វែង យករថយន្តបង្កទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយតាមនីតិវិធី៕ ផេង សុភាព