ស្នេហា គឺជាការលះបង់ ការយល់ព្រម និងការផ្ដល់ឱ្យមនុស្សស្រីម្នាក់ នាងព្រមលះបង់គ្រប់យ៉ាងដើម្បីអ្នក ព្រោះតែពាក្យថាស្រឡាញ់ នាងជឿជាក់លើអ្នក នាងគោរពអ្នក នាងឱ្យតម្លៃអ្នក ហើយវាក៏ជាឱកាសដែលអ្នកអាចបំផ្លាញនាងបានយ៉ាងងាយ ។ តែមុននឹងអ្នកចង់បំផ្លាញនាង អ្នកត្រូវដឹងថា ខ្លួនអ្នកជាប្រុស ឯម្ដាយអ្នកក៏ជាស្រីដែរ ដូច្នេះអ្នកគួរតែយល់ហើយថា ការលះបង់មានតម្លៃខ្លាំងប៉ុនណា តើមានមនុស្សស្រីប៉ុន្មាននាក់ដែលព្រមលះបង់ឱ្យអ្នកគ្រប់យ៉ាងបន្ទាប់ពីម្ដាយរបស់អ្នក។

បើអ្នកបំផ្លាញនាងមានន័យថា អ្នកកំពុងតែបំផ្លាញអនាគត និងតម្លៃរបស់ខ្លួនឯងដូចគ្នា ស្លាកស្នាមនៅលើរាងកាយរបស់នាង មិនយូរវានឹងរលុប តែការឈឺចាប់ដែលនៅក្នុងចិត្តវានឹងចងចាំអ្នកពេញមួយជីវិត អ្នកមិនអាចលុបបាបកម្មដែលអ្នកបានធ្វើទៅលើនាងបានឡើយ។

បើមិនអាចផ្ដល់ឱ្យនាងមានក្ដីសុខ សុភមង្គលក្នុងជីវិតឱ្យនាងនោះទេ សូមចាកចេញពីនាងទៅ កុំនៅសន្សំកម្ម និងបំផ្លាញនាងអី អហោសកម្មឱ្យគ្នា ជាតិថ្មីក៏មិនចាំបាច់ជួបលាងកម្មនឹងគ្នាទៀតដែរ៕