Chelsea ត្រៀមរុះរើអ្នកចាំទីចាស់ចេញជំនួសមកវិញដោយអ្នកចាំទីម្នាក់របស់ក្លិប AC Milan

#កីឡា# #Chelsea# #Donnarumma# #អ្នកចាំទី# #បាល់ទាត់អន្តរជាតិ#

1211

ក្លិបតោខៀវ Chelsea ត្រូវបានរាយការណ៍មកថា បានចាប់អារម្មណ៍ក្នុងការនាំយកអ្នកចាំទីដៃស្អិតរបស់ ក្លិប AC Milan កីឡាករ Donnarumma នៅកំឡុងទីផ្សារដោះដូរកីឡាកររដូវក្ដៅខាងមុខ។

បើតាមការចុះផ្សាយរបស់កាសែតអ៊ីតាលី Tuttosport បានឱ្យដឹងថា ក្លិបតោខៀវខាងលើកំពុងតែត្រៀមរៀបចំក្រុមឡើងវិញក្រោយអ្នកចាំទីដៃទីមួយរបស់ខ្លួន Kepa Arrizabalaga រក្សាសំណាញ់ទីមិនសូវបានល្អនៅរដូវកាលនេះ ហើយបានធ្វើឱ្យអ្នកចាត់ការទូទៅរបស់ក្លិបលោក Lampard ចង់បញ្ចេញរូបគេនៅរដូវក្តៅនេះ ម្ល៉ោះហើយ Donnarumma គឺជាបេក្ខភាពមួយរូបដែលអាចមកជំនួសតំបន់នេះបាន។

គួររំលឹកដែរថា Chelsea មានក្ដីសង្ឃឹមខ្លាំងលើ Kepa ពេលពួកគេទិញកីឡាករជម្រើសជាតិអេស្ប៉ាញ់រូបនេះទៅកាន់ទឹកដី Stamford Bridge ពី Athletic Club ក្នុងឆ្នាំ២០១៨។ ក្រុមតោខៀវសង្ឃឹមរូបគេ អាចជួយពួកគេលើកពាន Premier League បាន ប៉ុន្តែមិនដូចការរំពឹងទុកនោះទេ។

ចាប់តាំងពីលោក Lampard មកដឹកនាំក្រុមជិតមួយរដូវកាលនេះមក លោកមើលឃើញពីការវិវដ្តរបស់អ្នកចាំទីដៃទីមួយខាងលើហាក់នៅមានកម្រិតនៅឡើយ ហើយមួយរយៈចុងក្រោយនេះកន្លែងបស់គេត្រូវបានជំនួសមកវិញដោយអ្នកចាំទីដៃទីពីរ Caballero វិញ។

ក្រោយបញ្ហានេះកើតឡើង លោកកំពុងតែត្រៀមរៀបចំសំណើមួយចំនួនស្នើទៅក្លិប Milan ដើម្បីចុះហត្ថលេខាលើអ្នកចាំទី Donnarumma ហើយបើតាមរបាយការណ៍បានសរសេរថា ក្លិបតោខៀវនឹងផ្តល់កិច្ចសន្យារយៈពេល ៥ឆ្នាំ បូកជាមួយថ្លៃនឿយហត់ចំនួន ៨លានអឺរ៉ូ ក្នុងមួយរដូវកាលផងដែរ សម្រាប់អ្នកចាំទីរូបនេះ។

គួរបញ្ជាក់ផងដែរថា កុងត្រាបច្ចុប្បន្នរបស់ Donnarumma នៅមានសុពលភាពជាមួយក្លិបរហូតដល់ឆ្នាំ២០២១៕

កែសម្រួលដោយ៖ ភារ៉ា

ប្រភព៖ Calciomercato

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។