ថ្ងៃសុក្រនេះ រដ្ឋាភិបាលថៃបានរាយការណ៍ថា ប្រទេសថៃមានករណីថ្មីនៃឆ្លងមេរោគកូវីដ១៩ចំនួន ៧ នាក់ដែលមកពីប្រទេសចំនួន ៤ ហើយក្នុងនោះមានម្នាក់ដែលធ្លាប់ជាអ្នកជំងឺកូវីដ១៩ពីមុន។

មជ្ឈមណ្ឌលរដ្ឋបាលគ្រប់គ្រងស្ថានភាពមេរោគកូវីដ១៩បានមានប្រសាសន៍ថាអ្នកឆ្លងថ្មីទាំង ៧ នាក់មានជនជាតិថៃ ៥ នាក់និងជនបរទេស ២ នាក់​ត្រឡប់មកពីប្រទេសអារ៉ាប៊ីសាអូឌីត បង់ក្លាដែស កាតា និងប្រទេសប៉ាគីស្ថាន។ អ្នកជំងឺថ្មី ៣ នាក់ដំបូងគឺជាជនជាតិថៃដែលបានវិលត្រឡប់មកពី​ប្រទេសអារ៉ាប៊ីសាអ៊ូឌីត​ដែលក្នុងនោះមានក្មេងស្រី ២ នាក់ អាយុ ១៤ និង ៩ ឆ្នាំ និងបុរសម្នាក់អាយុ ៦១ ឆ្នាំ​។ ពួកគេបានមកដល់ប្រទេសថៃនៅថ្ងៃទី ៥ ខែកញ្ញា ហើយត្រូវបាន​ដាក់ឱ្យនៅដាច់ដោយឡែកក្នុងទីក្រុងបាងក​ក និងធ្វើតេស្តវិជ្ជមានកូវីដ១៩កាលពីថ្ងៃពុធ។

អ្នកជំងឺថ្មីទី ៤ គឺជាកម្មករភេទប្រុសអាយុ ៥០ ឆ្នាំ​បានមកដល់ប្រទេសថៃនៅថ្ងៃទី ៥ ខែកញ្ញា​ និងត្រូវបានដាក់ឱ្យនៅដាច់ដោយឡែកក្នុងទីក្រុងបាងកក ហើយ​ធ្វើតេស្តវិជ្ជមានកាលពីថ្ងៃពុធ។ គួរបញ្ជាក់ផងដែរថា អ្នកជំងឺថ្មីទី ៤ ធ្លាប់ឆ្លងមេរោគកូវីដ១៩កាលពីខែកក្កដា ​និងបានជាសះស្បើយ ហើយ​នេះគឺជាការឆ្លងលើកទី ២។

អ្នកជំងឺថ្មីទី ៥ គឺជាពលករចំណាកស្រុក​ជនជាតិថៃត្រឡប់មកពីប្រទេស​កាតា​មានអាយុ ៤១ ឆ្នាំ បានមកដល់ប្រទេសថៃកាលពីថ្ងៃអាទិត្យ ​និងត្រូវបានដាក់ឱ្យនៅដាច់ដោយឡែកក្នុងខេត្តឈុនបុរី ​ហើយបានធ្វើតេស្តវិជ្ជមានកាលពីថ្ងៃពុធ។ ​

អ្នកជំងឺថ្មីទី ៦ គឺជាបុរសជនជាតិបង់ក្លាដែសម្នាក់​បានមកដល់ប្រទេសថៃនៅថ្ងៃទី ២ ខែកញ្ញា ​និង​ត្រូវបានដាក់ឱ្យនៅ​ដាច់ដោយឡែក​ក្នុងទីក្រុង​ ហើយធ្វើតេស្តវិជ្ជមានកាលពីថ្ងៃអង្គារ។ ​អ្នកជំងឺថ្មីទី ៧ ​គឺជាក្មេងប្រុសជនជាតិប៉ាគីស្ថានអាយុ ១០ ឆ្នាំបានមកដល់ប្រទេសថៃកាលពីថ្ងៃអាទិត្យ និងបានធ្វើតេស្តវិជ្ជកាលពីថ្ងៃពុធ។ ​

​គិតមកដល់ថ្ងៃសុក្រនេះ ប្រទេសថៃមានអ្នកជំងឺកូវីដ១៩សរុបចំនួន ៣ ៤៩៧ នាក់ក្នុងនោះមានអ្នកជាសះស្បើយចំនួន ៣ ៣២៨ នាក់និងបន្សល់ទុកអ្នកជំងឺចំនួន ១១១ នាក់ទៀតកំពុងសម្រាកព្យាបាលនៅមន្ទីរពេទ្យ ហើយអ្នកស្លាប់នៅរក្សាចំនួន ៥៨ នាក់ដដែល។

​មជ្ឈមណ្ឌល CCSA បានមានប្រសាសន៍ថា នៅទូទាំងពិភពលោកមានអ្នកជំងឺកូវីដ១៩សរុបចំនួន ៣០.៣៥ លាននាក់ និងមានអ្នកស្លាប់សរុបចំនួន​ ៩៥០ ៥៤៥ នាក់។ សហរដ្ឋអាមេរិកមាន​អ្នកឆ្លងច្រើនជាងគេគឺ ៦.៨៧ លាននាក់ និងមានអ្នកស្លាប់ច្រើនបំផុតគឺ ២០២ ២១៣ នាក់។ ប្រទេសថៃជាប់ចំណាត់ថ្នាក់ទី ១៣០ ក្នុងចំណោមប្រទេសដែលឆ្លងមេរោគកូវីដ១៩នៅទូទាំងពិភពលោក៕

កែសម្រួលដោយ៖ ភារ៉ា

ប្រភព៖ bangkok post