លោក ញ៉ាញ់ ជាបហ៊ង ប្រធានមន្ទីរធនធានទឹកនិងឧតុនិយមខេត្តកំពង់ស្ពឺ បានឲ្យដឹងថា នៅចំពោះមុខ បើសិនជាមានហានិភ័យកើតឡើងពីការខ្វះខាតទឹក គឺមានតែស្រុកចំនួន៣ទេ ដែលប្រឈមមុនគេ នោះគឺស្រុកបសេដ្ឋ ភ្នំស្រួច និងស្រុកគងពិសី ដោយសារតែស្រុកទាំងនេះមានស្ថានភាពឆ្ងាយពីប្រភពទឹក។

តែយ៉ាងណាក៏ដោយ មកដល់ពេលនេះនៅទូទាំងខេត្តកំពង់ស្ពឺ ពុំទាន់មានបញ្ហាប្រឈមការខ្វះខាតទឹកនោះទេ ហើយអាជ្ញាធរក៏បានកំណត់តំបន់ត្រៀមទឹកច្រើនទុក សម្រាប់ជួយសង្គ្រោះដល់តំបន់ដែលមានបញ្ហាប្រឈម។

លោក ជាបហ៊ង បានបញ្ជាក់ថា បច្ចុប្បន្នមន្ទីរធនធានទឹក និងឧតុនិយមបាន និងកំពុងនាំទឹកពីអាងស្តុកទឹកទៅកាន់ផ្លូវជាតិលេខ៣បន្តទៀតតាមរយៈប្រឡាយមេរលាំងជ្រៃក្នុងនោះចរន្តទឹកកំពុងហូរតាមប្រឡាយនានាតាមដងផ្លូវជាតិលេខ៤ដែរ ប៉ុន្តែដោយសារការប្រើប្រាស់ទឹកប្រឡាយរបស់ប្រជាពលរដ្ឋមានកម្រិតទាបខណៈដែលសព្វថ្ងៃប្រជាពលរដ្ឋយើងភាគច្រើនបានប្រើប្រាស់ ទឹកស្អាតជំនួសវិញ។

លោកប្រធានមន្ទីរបានបញ្ជាក់ដែរថា ជាមួយគ្នាតាមរយៈក្រសួងធនធានទឹក មន្ទីរបានត្រៀមធុង ទឹកម៉ាស៊ីនបូមទឹក រថយន្តដឹកទឹកទុកជាស្រេចដើម្បីជួយសង្គ្រោះតំបន់ ដែលប្រឈមខ្វះខាតទឹកដោយប្រើប្រាស់ទឹកស្អាតតែម្តងទៅជូនពួកគាត់ផងដែរ៕