ខេត្តសៀមរាប៖ គ្រួសារប្រជាពលរដ្ឋមកពីខេត្តបន្ទាយមានជ័យ ដែលទើបនឹងសម្រាលបានកូនភ្លោះបី កាលពីថ្ងៃទី០២ ខែឧសភា ឆ្នាំ២០១៩ នៅមន្ទីរពេទ្យគន្ធបុប្ផា ខេត្តសៀមរាប ទទួលបានអំណោយដ៏ថ្លៃថ្លារបស់សម្ដេចតេជោ ហ៊ុន សែន និង        សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន។

កូនភ្លោះទាំង០៣នាក់នេះ មានប្រុស២នាក់ និង ស្រី១នាក់ ដែលមានឪពុកឈ្មោះ អូ ញ៉ា និងម្តាយឈ្មោះ ឳ ស្រីរ៉ង មានស្រុកកំណើតនៅភូមិព្រះឬស្សី ឃុំព្រះពន្លា ក្រុងសិរីសោភណ្ឌ ខេត្តបន្ទាយមានជ័យ បានទទួលអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិត រួមមាន ៖ អង្ករចំនួន ២០០ គីឡូក្រាម , ទឹកដោះគោចំនួន០១កេស , ស្ករសចំនួន០៥គីឡូក្រោម , ក្រម៉ា០២ , សារ៉ុង០២ និងថវិកាចំនួន៥លានរៀលផងដែរ។

លោក សេង ទៀង បានមានប្រសាសន៍នៅក្នុងពិធីប្រគល់អំណោយកាលពីរសៀលថ្ងៃទី១៨ ខែឧសភា ឆ្នាំ២០១៩ថា ការយកអំណោយមកផ្តល់ជូនក្រុមគ្រួសារកូនភ្លោះទាំង៣នាពេលនេះ គឺសម្តេចតេជោ និងសម្តេចកិត្តិព្រឹទ្ធបណ្ឌិត មិនបានប្រកាន់ពូជសាសន៍នោះទេ ហើយក៏មិនប្រកាន់និន្នាការនយោបាយដែរ ឲ្យតែបងប្អូនប្រសូតបានកូនភ្លោះ៣ គឺកូនទាំងនោះជាចៅរបស់សម្តេច ហើយនឹងទទួលបានអំណោយដូចៗគ្នា។

លោក សេង ទៀង បានបន្ថែមថា ការមកចែកអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់កូនភ្លោះទាំង៣នាក់នេះ គឺជាលើកទី៣៤៥ ហើយ៕ អត្ថបទ&រូបភាពៈ ជា ស្រស់ ខេង ឧត្តម