មន្ត្រីហុងកុងបានបញ្ជាក់ថា ជំងឺប៉េសជ្រូកអាហ្វ្រិកបានឆ្លងរាលដាល នៅដែនកោះហុងកុងមួយនេះ ជាលើកទី២ បន្ទាប់ពីវាបានឆ្លងរាលដាលយ៉ាងខ្លាំងនៅចិនដីគោក ។ ការផ្ទុះឡើងជាថ្មីនេះ ក៏បានបញ្ជាក់ផងដែរថា ជំងឺប៉េសជ្រូកអាហ្វ្រិកបាននិងកំពុងរាលដាលនៅភពខាងក្រៅ ក្រៅពីនៅចិនដីគោក ។ រដ្ឋាភិបាលបានបញ្ជាឲ្យសម្លាប់សត្វជ្រូកចំនួន ៤,៧០០ ក្បាលដើម្បីកាត់ផ្តាច់ឫសគល់ជំងឺប៉េសជ្រូកអាហ្វ្រិកនេះ ។

កាលពីរសៀលថ្ងៃទី៣១ ខែឧសភា លោកស្រី Sohphia Chan ទទួលបន្ទុកកិច្ចការសុខាភិបាលបញ្ជាក់ថា ករណីជំងឺប៉េសជ្រូកអាហ្វ្រិកនេះ វាបណ្តាលឲ្យងាប់សត្វជ្រូក ប៉ុន្តែមិនគំរាមកំហែងដល់មនុស្សនោះឡើយ ។ ជំងឺនេះបានរកឃើញនៅទីតាំងសត្តឃាតមួយកន្លែងនៅតំបន់ New Territories ជាប់ព្រំប្រទល់ជាមួយខេត្ត Guangdong ភាគខាងត្បូងរបស់ប្រទេសចិន ។

អ្នកស្រីបន្តថា ទីតាំងសត្តឃាតនេះត្រូវបញ្ជាឲ្យបិទទ្វារកាលពីយប់ថ្ងៃទី៣១ ខែឧសភា ដើម្បីសម្អាត ។ ជំងឺប៉េសជ្រូកទីមួយ បានផ្ទុះឡើងកាលពីបីខែកន្លងមកហើយ បង្ខំឲ្យរដ្ឋាភិបាលចេញបញ្ជាសម្លាប់សត្វជ្រូកប្រហែល ៦ ៥០០ ក្បាល ដើម្បីការពារកុំឲ្យជំងឺប៉េសជ្រូកអាហ្វ្រិកនោះឆ្លងរាលដាល ។

ជំងឺប៉េសជ្រូកអាហ្វ្រិកនេះ បានឆ្លងរាលដាលស្ទើរតែគ្រប់ខេត្តទាំងអស់ នៅចិនដីគោក ចាប់តាំងពីករណីដំបូងគេ ផ្ទុះឡើងនៅក្នុងខែសីហា ឆ្នាំ២០១៨ ។ ករណីជំងឺប៉េសជ្រូកកាលពីថ្ងៃទី៣១ ខែឧសភា ឆ្នាំ២០១៩នេះ បានរកឃើញនៅក្នុងសត្វជ្រូក ដែលកំពុងដឹកជញ្ជូនទៅកាន់ភាគនិរតីខេត្ត Guizhou ៕ thach086