​រាជធានី​ភ្នំពេញ​ ​៖​ ​មនុស្ស២នាក់​បាន​ស្លាប់​ភ្លាម​ៗ​ ​ដោយ​ម្នាក់​កប់​ក្រោម​រថយន្ត​ ​និង​ម្នាក់​ទៀ​ត​គៀប​ជាប់​ក្នុង​កាប៊ីន​ ​ខណៈ​ដែល​មនុស្ស៧នាក់​ផ្សេងទៀត​រង​របួសធ្ងន់​ស្រាល​ ​នៅក្នុង​ហេតុការណ៍​គ្រោះថ្នាក់​ចរាចរ​ ​កាលពី​ម៉ោង១២ថ្ងៃត្រង់​ ​ថ្ងៃទី១៨​ ​ខែកក្កដា​ ​ឆ្នាំ២០១៩នេះ​ ​ស្ថិតនៅ​តាម​បណ្តោយ​មហាវិថី​ឈ្នះ​ឈ្នះ​ ​ក្នុង​ភូមិ​ព្រែកតាសេក​ ​សង្កាត់​ព្រែកតាសេក​ ​ខណ្ឌ​ជ្រោយចង្វា​។​ ​

តាម​ប្រភព​នៅកន្លែង​កើតហេតុ​បាន​ឲ្យដឹង​ថា​ ​មុន​កើតហេតុ​គេ​ឃើញ​រថយន្ត​កូរ៉េ​ពណ៌ខៀវ​ ​ជិះគ្នា៣នាក់​ ​ប្តី​ប្រពន្ធ​និង​កូនតូច​អាយុ៣ឆ្នាំ​បាន​ធ្វើដំណើរ​ក្នុង​ទិសដៅ​ពី​កើត​ទៅ​លិច​ ​ខណៈ​មកដល់​ចំណុច​កើតហេតុ​ ​ក៏​មាន​បញ្ហា​បច្ចេកទេស​ដាច់​ម៉ែត្រ​ចង្កូត​ ​ទើប​រេ​ឡើង​ខឿន​ទ្រូងផ្លូវ​ប្រមាណ​ជា១០ម៉ែត្រ​ ​ទើប​ធ្លាក់ចុះ​មកវិញ​ ​រួច​រេ​ទៅ​ខាងស្តាំ​ ​ក៏​ត្រូវ​រថយន្ត​ធុន​ធំ​ម៉ាក​ ​FUSO​ ​ពណ៌បៃតង​ ​ពាក់​ស្លាក​លេខ​ ​តាកែវ​ ​3A​-​1110​ ​ដឹក​អុស​ ​ជិះគ្នា៨នាក់​ ​បើក​ស្រប​ទិស​គ្នា​ក្នុង​ល្បឿន​លឿន​ជ្រុល​ទៅ​បុក​ពីក្រោយ​ ​រថយន្ត​កូរ៉េ​ ​បណ្តាល​ឲ្យ​រថយន្ត​កូរ៉េ​ ​ដាច់​ជា២កំណាត់​ ​ធ្លាក់​ដាច់​ជ្រុះ​កាប៊ីន​ ​ស្លាប់​ប្តី​កប់​ក្រោម​រថយន្ត​ ​ចំណែក​ប្រពន្ធ​និង​កូនរង​របួសធ្ងន់​ ​ហើយ​រថយន្ត​ ​FUSO​ ​បន្ត​ទៅ​បុក​ផ្ទប់​ដើមឈើ​ស្លាប់​ម្នាក់​ ​ចំណែក​អ្នកបើកបរ​រត់គេច​ខ្លួន​បាត់​ ​និង​មនុស្ស៧នាក់​ទៀត​រង​របួសធ្ងន់​ស្រាល​។​

​ក្រោយ​កើតហេតុ​ ​ជនរងគ្រោះ​រង​របួសធ្ងន់​ស្រាល៧នាក់​ ​ត្រូវ​បាន​ដឹក​បញ្ជូន​ទៅកាន់​មន្ទីរពេទ្យ​ ​ចំណែក​ជនរងគ្រោះ​ដែល​ស្លាប់​ត្រូវ​សមត្ថកិច្ច​គាស់​យក​សាកសព​ចេញ​ដើម្បី​ប្រគល់​សព​ទៅ​ឲ្យ​ក្រុម​គ្រួសារ​ដឹក​យក​ទៅ​ធ្វើបុណ្យ​តាម​ប្រពៃណី​នៅ​ឯ​ស្រុក​កំ​ណើ​ត​រៀង​ៗ​ខ្លួន​។​ ​ចំណែក​រថយន្ត​ទាំង២គ្រឿង​ត្រូវ​បាន​សមត្ថកិច្ច​ស្ទូច​យក​ទៅ​រក្សាទុក​នៅ​ការិយាល័យ​ចរាចរ​ណ៏​ជើងគោក​ស្នងការ​នគរបាល​រាជធានី​ភ្នំពេញ​ដើម្បី​ដោះស្រាយ​គ្នា​នៅពេល​ក្រោយ​៕​