The Sunsports ចេញផ្សាយនៅថ្ងៃពុធទី១៧ ខែកក្កដានេះបានឲ្យដឹងថា ក្រោយការបដិសេធ មិនចូលរួមជាមួយនឹងក្លឹប ធ្វើដំណើរទៅប្រកួតមិត្តភាពតាមទ្វីបត្រៀមបើករដូវកាលថ្មីមកកីឡាករLaurent Koscielnyនឹងត្រូវផ្ទេរតំណែងជាប្រធានក្រុមដោយលោកEmeryទៅឲ្យកីឡាករXhakaវិញ។

Xhakaជាកីឡាករបេក្ខភាពខ្លាំងជាងគេបន្ទាប់ពីកីឡាករបារាំងជើងចាស់របស់ក្លឹបរូបនេះ។កីឡាករចាស់ៗរបស់ក្លឹបដូចជាPetr CechនិងAaron Ramseyសុទ្ធតែបានចាកចេញពីក្លឹបតាំងតែពីរដូវកាលមុនម្ល៉េះហើយហាក់មិនមានកីឡាកររូបណាដែលអាចនឹងជំនួសតំណែងនេះបានក្រៅតែពីកីឡាករស្វីសនេះឡើយ។

Xhakaវ័យ២៦ឆ្នាំជាកីឡាករចំណូលចិត្តរបស់លោកEmeryដោយរូបគេបានបង្ហាញខ្លួនស្ទើរតែគ្រប់ប្រកួតកាលពីរដូវកាលមុនប៉ុន្តែទោះបីជាយ៉ាងណាក្តីគ្រូបង្វឹកបារាំងរូបនេះក៏បានបញ្ជាក់ដែរថា Mesut Ozil ក៏អាចនឹងស្ថិតនៅក្នុងបេក្ខភាពជាប្រធានក្រុមនេះដែរហើយត្រូវរងចាំដល់នាទីចុងក្រោយនៃការប្រកាសជាផ្លូវការ៕