ក្រោយត្រលប់ពីការទទួលពាន Marca នៅទីក្រុង Madrid វិញ កាលពីម្សិលមិញគេហទំព័រ Daily Mail បានចុះផ្សាយថាខ្សែប្រយុទ្ធ Cristiano Ronaldo បានផ្តល់ដំបូន្មានតាមបណ្តាញ Whatapp ដល់មិត្តរួមក្រុម Paulo Dybala ថាគាត់ត្រូវតែផ្លាស់ទៅ Manchester United នៅរដូវក្តៅនេះ ប្រសិនចង់ឈ្នះជើងឯក និងជោគជ័យក្នុងអាជីពបន្តទៀត។កីឡាករអន្តរជាតិអាហ្សង់ទីនវ័យ ២៥ឆ្នាំ រូបនេះកំពុង ធ្វើការសម្រេចចិត្តការផ្លាស់ទៅកាន់ទឹកដី Old Trafford ក្នុងរយៈពេល ៤៨ម៉ោងបន្ទាប់ពីក្រុម Juventus យល់ព្រមលើកិច្ចព្រមព្រៀងផ្លាស់ប្តូរជាមួយខ្សែប្រយុទ្ធ Romelu Lukaku ទៅកាន់ទីក្រុង Turin។

Ronaldo បានបញ្ជាក់ផងដែរថា ក្រុម Man.United បានធ្វើឱ្យរូបគេឈ្នះពាននិងល្បីល្បាញក្នុងកំឡុងពេលស្នាក់នៅ Old Trafford រយៈពេល ៦ឆ្នាំ ហើយជឿជាក់ថាក្លិប នឹងជួយ Dybala ជោគជ័យដូចរូបគេដែរ។យ៉ាងណាមិញ Dybala មានបំណងបន្តលេងនៅ Juventus រដូវកាលថ្មីនេះ និងចង់ពិភាក្សាពីអនាគតរបស់ខ្លួនជាមួយគ្រូបង្វឹកលោក Maurizio Sarri មុននឹងធ្វើការសម្រេចចិត្តចុងក្រោយ។ ការពិត Dybala ចង់បានប្រាក់ឈ្នួលប្រមាណ ៧.៥លានផោន ក្នុងមួយឆ្នាំរបស់គាត់នៅឯក្លិប Juventus ប៉ុន្តែរូបគេកំពុងពិចារណាទាមទារលើប្រាក់ពលកម្ម ៣៥០,០០០ផោនក្នុងមួយសប្តាហ៍ជាគោលដៅផ្លាស់ទៅទឹកដី Old Trafford របស់ក្រុមបិសាចក្រហម៕