​ស្រប​ពេល​​សាធារណជន​មួយចំនួន ​កំពុង​តែមានការ​ព្រួយបារម្ភ អំពី​សុវត្ថិភាព​ ​ក្នុង​ការ​ទទួលទាន​សាច់​ជ្រូក​ប្រចាំថ្ងៃ​ ​ខណៈ​ជំងឺ​ប៉េស្ត​ជ្រូក​អាហ្រ្វិក​កំពុងតែ​ផ្ទុះឡើង ​នៅ​ប្រទេសជិតខាង​ ​និងនៅ​ក្នុង​ប្រទេស​កម្ពុជា​ផង​នោះ​ ​មន្ទីរ​កសិកម្ម​ ​រុក្ខាប្រមាញ់​ ​និង​នេសាទ​ ​ខេត្តព្រៃវែង​ ​បាន​ចេញ​សេចក្តី​ណែនាំ​ដល់​ម្ចាស់​សត្តឃាតដ្ឋាន​ ​កន្លែង​ប្រមូល​ទិញ​សត្វ​រស់​ ​និង​អាជីវករ​លក់​ផលិតផល​សត្វ​ ក្នុង​ខេត្ត​ទាំងអស់​ ​ត្រូវ​អនុវត្ត​វិធានការ​បសុព្យាបាល​។​

​ក្នុង​នោះ​ ​អាជីវករ​ដែល​ប្រមូល​ទិញ​ជ្រូក​រស់​ ​និង​ផលិតផល​ពី​សត្វ​ ​គឺ​មិន​ត្រូវ​ទិញ​ជ្រូក​ឈឺ​ ​ឬ​ងាប់​នៅ​តំបន់​ផ្ទុះ​ជំងឺ​ ​ឬ​តំបន់​ផ្សេង​ៗ​ទៀត​ទេ​ ​ព្រមទាំង​ហាមមិនឲ្យ​ដឹកជញ្ជូន​ចរាចរ​សត្វ​ឈឺ​ ​ឬ​ងាប់​ពី​តំបន់​មួយ​ទៅ​តំបន់​មួយ​ឡើយ​។​

​សម្រាប់​អាជីវករ​ពិឃាតសត្វ​ត្រូវ​ទិញ​ជ្រូក​ដែល​មាន​សុខភាព​ល្អ​ ​និង​ប្រភព​ច្បាស់លាស់​ពី​តំបន់​ដែល​គ្មាន​ជំងឺឆ្លង​ ​ដោយមាន​លិខិតបញ្ជាក់​ពី​ការទិញ​លក់​បាន​ត្រឹមត្រូវ​ ​ហើយ​រាល់​ការ​ប្រមូល​ទិញ​ត្រូវ​មាន​លិខិតបញ្ជាក់​អនាម័យ​សត្វ​ ​និង​ផលិតផល​មាន​ដើមកំណើត​ពី​សត្វ​៕​ យឺត ភារ៉ា