គយ នឹងចោទសួរម្ចាស់ក្រុមហ៊ុន នាំសំរាមប្លាស្ទិកចូលស្រុក ដើមសប្ដាហ៍ក្រោយ

#កាកសំណល់# #សង្គម# #សេដ្ឋកិច្ចជាតិ#

ភ្នំពេញ៖ ម្ចាស់ក្រុមហ៊ុន ជុង យៀន ប្លាស្ទិក (Chung yuen ) ដែលរកឃើញថា បាននាំចូលសំរាមប្លាស្ទិក ពីអាមេរិក និងកាណាដា ៨៣ កុងតឺន័រ ត្រូវបានអគ្គនាយកដ្ឋានគយ និងរដ្ឋាករ កោះហៅឲ្យចូលបំភ្លឺ នៅដើមសប្ដាហ៍ក្រោយ ។

លោក គុណ ញឹម អគ្គនាយកគយ និងរដ្ឋាករ បានថ្លែងប្រាប់ក្រុមអ្នករាយការណ៍ព័ត៌មានកាលពីល្ងាច ថ្ងៃទី១៩ កក្កដា ថា នៅដើមសប្ដាហ៍ក្រោយ នឹងធ្វើការជាមួយក្រុមហ៊ុន ដោយហៅមកសាកសួរផ្ទាល់មាត់ថែមទៀត ពាក់ព័ន្ធ នឹងព័ត៌មានដែលក្រុមហ៊ុននាំចូលកាកសំណល់សំរាមបា្លស្ទិកចំនួន ៨៣កុងតឺន័រ ។ លោកថា តាមលទ្ធផល នៃការស្រាវជ្រាវ គឺតម្រូវឲ្យក្រុមហ៊ុននាំទៅវិញ ហើយនឹងអាចពិន័យទៅលើក្រុមហ៊ុននោះ ដោយអាចប្រឈមវិន័យរដ្ឋបាល និងអាចប្រឈមការបិទក្រុមហ៊ុន។

គួរបញ្ជាក់ថា កាលពីរសៀលថ្ងៃទី១៦កក្កដា មានហេតុការភ្ញាក់ផ្អើល បន្ទាប់ពីបានរកឃើញ សំរាមប្លាស្ទិក ក្នុងកុងតឺន័រចំនួន៨៣ ទម្ងន់១៦០០តោន នៅកំពង់ផែស្វយ័តក្រុងព្រះសីហនុ ។ លោក គុណ ញឹម បានឲ្យដឹងថា ក្រុមហ៊ុននេះ មានថៅកែជាខ្មែរ ចំណែកអ្នកបម្រើការងារ ជាជនជាតិចិន ៕ DY

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។