ក្ដីស្រលាញ់របស់មនុស្សពីរនាក់ យើងអាចមើលដឹងតាមរយៈការបង្ហាញ និងការយកចិត្តទុកដាក់គ្នាទៅវិញទៅមកនិងពាក្យសម្ដីដែលនិយាយចេញមកបូករួមទាំងកាយវិកានានា ដែលធ្វើចំពោះគ្នា។​ តែតើយើងអាចដឹងថា មនុស្សដែលគ្រាន់តែនិយាយថាស្រលាញ់យើងនិងមនុស្សដែលស្រលាញ់យើងពិតប្រាកដដោយវិធីណា?

មនុស្សដែលគ្រាន់តែនិយាយថាស្រលាញ់យើង គេនឹងព្យាយាមនិយាយពាក្យថាស្រលាញ់ ចង់នៅក្បែរចង់មើលថែយើងជានិច្ចកាល ប៉ុន្តែគេតែងចង់ឱ្យយើងសម្របតាមគេ និងធ្វើអ្វីដែលគេចូលចិត្ត គេថែមទាំងមិនដឹងថាខ្លះដែលគេព្យាយាមទាញយើងឱ្យទៅធ្វើនូវរឿងដែលគេចូលចិត្តជារឿងដែលធ្វើឱ្យយើងមានសម្ពាធនិងពិបាកទៅវិញ។ គេចូលចិត្តទិញឬយករបស់ដែលគេស្រលាញ់មកឱ្យយើង ដោយប្រាប់យើងថា នេះជារបស់គេស្រលាញ់ទាំងដែលគេមិនដែលស្វែងយល់ច្បាស់ថា យើងស្រលាញ់អីពិតប្រាកដនោះទេ។ ទង្វើខ្លះគេគ្រាន់តែចង់បង្ហាញ ឬអួតទៅអ្នកដទៃថា គេមានយើងជាសង្សារ ហើយគេមានមនុស្សម្នាក់ដែលស្រលាញ់គេ ហើយធ្វើគ្រប់យ៉ាងតាមគេទាំងអស់។ ប៉ុន្តែវាខុសពីមនុស្សដែលស្រលាញ់យើងពិតប្រាកដ។

មនុស្សដែលស្រលាញ់យើងពិតប្រាកដ មិនមែនសុទ្ធតែបាននៅក្បែរយើង ថ្នាក់ថ្នមយើង ឬនិយាយពាក្យថាស្រលាញ់យើងគ្រប់ពេលនោះទេ ពេលខ្លះ គេគ្រាន់តែជាមនុស្សម្នាក់ដែលនៅក្បែរយើង ហើយធ្វើរឿងគ្រប់យ៉ាងសម្រាប់យើង ស្វែងយល់ចិត្តយើងច្បាស់ ថាយើងស្រលាញ់អ្វីពិតប្រាកដ។ គេតែងលួចសម្លឹងមុខយើងនៅពេលយើងមិនដឹងខ្លួន ហើយក៏លួចញញឹមម្នាក់ឯង ហើយក៏អាចធ្វើឱ្យយើងដឹងម្ដងម្កាលដែរ។ មនុស្សដែលស្រលាញ់យើងពិតប្រាកដ ជាមនុស្សដែលមានក្ដីស្រលាញ់ធំធេង ហើយហ៊ានលះបង់យើងឱ្យទៅអ្នកដទៃ បើគេគិតច្បាស់ថា អ្នកដទៃនឹងមើលថែយើងបានល្អ ហើយគេគិតថា យើងមានក្ដីសុខជាមួយអ្នកទៃ ហើយបើថ្ងៃណាមួយយើងមានបញ្ហាអ្វីគេនឹងតែងតែនៅឈរក្បែរយើងញញឹមដាក់យើងហើយនិយាយថា «មិនអីទេ ខ្ញុំនៅទីនេះ មិត្តម្នាក់នេះនឹងនៅក្បែរអ្នកជារៀងរហូត...»