ភ្នំពេញ ៖ សហព័ន្ធកីឡាវ៉ូវីណាមកម្ពុជា គ្រោងនឹងដំណើរការប្រកួតសាកល្បងជ្រើសរើសអត្តពលិក ជម្រើសជាតិជាច្រើនដំណាក់កាលទៀត ដើម្បីត្រៀមប្រជែងមេដាយ នៅក្នុងព្រឹត្តិការណ៍ ជើងឯកកីឡា វ៉ូវីណាមពិភពលោក (Vivonam World Championships 2019) លើកទី៦ ឆ្នាំ២០១៩ ក្នុងឋានៈកម្ពុជាធ្វើជាម្ចាស់ផ្ទះ។ឯកឧត្តម អ៊ូ រតនា អនុប្រធានទី១ សហព័ន្ធកីឡាវ៉ូវីណាមកម្ពុជាបញ្ជាក់ប្រាប់ ទីភ្នាក់ងារ សារព័ត៌មានកម្ពុជា AKP ឱ្យដឹងនៅថ្ងៃទី៣១ ខែកក្កដា ឆ្នាំ២០១៩នេះថា ការប្រកួត​សាក​ល្បងជ្រើសរើស កាលពីចុងសប្តាហ៍នេះ គឺសហព័ន្ធស្វែងរកបានក្រុមជម្រើស ជាតិរបស់ខ្លួន​ជិត៣០នាក់ ដើម្បីត្រៀមចូលរួមព្រឹត្តិការណ៍ការប្រកួត កីឡាវ៉ូវីណាមជ្រើសរើសជើងឯក​ពិភព​លោក នាខែធ្នូខាងមុខនេះ។

ឯកឧត្ដមបានលើកឡើងថា នេះជាការសាកល្បងសមត្ថភាព​ក្រុមជម្រើសជាតិប្រចាំខែ ដើម្បីស្ទាបស្ទង់ បច្ចេកទេសលើវិញ្ញាសាសម្តែង និងប្រយុទ្ធនានា។ ឯកឧត្ដមបានបន្ដថា សហព័ន្ធមានគម្រោងសាកល្បងបែបនេះជាច្រើនដំណាក់ កាលទៀត ដើម្បីស្វែងរកកីឡាករ កីឡាការិនីប្រកបដោយគុណភាពពិតប្រាកដ និងឱ្យបានច្រើនជាងនេះ ដែលគ្រោងបន្តការហ្វឹកហាត់ នៅប្រទេសវៀតណាម ដែលជាម្ចាស់ដើមនៃក្បាច់គុនវ៉ូវីណាម ក្នុងគោលដៅបង្កើនគុណភាពឱ្យកាន់តែខ្លាំងក្លាត្រៀមប្រជែងមេដាយ នៅក្នុងឋានៈជាម្ចាស់​ផ្ទះ។ព្រឹត្តិការណ៍កីឡាវ៉ូវីណាមជើងឯកពិភពលោក លើកទី៦ ឆ្នាំ២០១៩ នៅកម្ពុជានេះ នឹង​ត្រូវកំណត់យកការប្រកួតពីថ្ងៃទី១៦ ដល់២២ ខែធ្នូ ឆ្នាំ២០១៩ ក្រោមការរៀបចំដោយ​សហព័ន្ធ​កីឡាវ៉ូវីណាមកម្ពុជាសហការជាមួយក្រសួងអប់រំ យុវជន និងកីឡា គាំទ្រដោយគណៈ​កម្មាធិ​ការ​​ជាតិអូឡាំពិកកម្ពុជា បន្ទាប់ពីផ្តល់សិទ្ធិឱ្យ រៀបចំដោយសហព័ន្ធកីឡាវ៉ូវីណាម​ពិភព​លោក៕