នៅថ្ងៃអាទិត្យនេះ មជ្ឈមណ្ឌល​រដ្ឋបាលគ្រប់គ្រងស្ថានភាពមេរោគកូវីដ១៩បានរាយការណ៍ថា ប្រទេសថៃមាន​ករណីថ្មីនៃអ្នកឆ្លងមេរោគកូវីដ១៩ ចំនួន ៦ នាក់​ និងមិនមានអ្នកស្លាប់ថ្មីទេ។

​អ្នកជំងឺថ្មី​ ​៥ នាក់ដំបូងគឺ​ជា​ជនជាតិថៃត្រលប់មកពីប្រទេសសិង្ហបុរីចំនួន ៣ នាក់​  និង​ត្រឡប់មកពីសហរដ្ឋអាមេរិកចំនួន ២ នាក់​។ ចំណែកអ្នកជំងឺថ្មីទី ៦ គឺជាបុរសជនជាតិបារាំងម្នាក់ធ្វើដំណើរមកពីចក្រភពអង់គ្លេស។ ​គិតមកដល់ថ្ងៃនេះ ប្រទេសថៃមានអ្នកឆ្លង​មេរោគកូវីដ១៩សរុបចំនួន ៣ ៤៤៤ នាក់ ​ដែលមានអ្នកជាសះស្បើយចំនួន ៣ ២៨១ នាក់ និងបន្សល់ទុកអ្នកជំងឺចំនួន ១០៥ នាក់កំពុងសម្រាកព្យាបាល​ក្នុងមន្ទីរពេទ្យ​ ហើយអ្នកស្លាប់នៅរក្សាចំនួន​ ៥៨ នាក់ដដែល។

​យោងតាមប្រភព ​​Worldometer គិតត្រឹមម៉ោង ១០ ព្រឹកថ្ងៃអាទិត្យ ចំនួនសរុប​នៃអ្នកឆ្លងមេរោគកូវីដ១៩ ទូទាំងពិភពលោកបានកើនឡើងដល់ ២៧ លាននាក់ និងមានអ្នកស្លាប់សរុបចំនួន ៨៨៣ ៧០៧ នាក់​។ សហរដ្ឋអាមេរិកមាន​អ្នកឆ្លងច្រើនបំផុតគឺ ៦.៤៣ លាននាក់ បន្ទាប់មកគឺប្រទេសប្រេស៊ីលមានអ្នកឆ្លងសរុបចំនួន ៤.១២ លាននាក់ ហើយប្រទេសឥណ្ឌាមានអ្នកឆ្លងសរុបចំនួន ៤.១១ លាននាក់។ គួរបញ្ជាក់ផងដែរថា ប្រទេសថៃជាប់ចំណាត់ថ្នាក់ទី ១២២ ក្នុងចំណោមប្រទេសដែលឆ្លងមេរោគកូវីដ១៩នៅទូទាំងពិភពលោក៕

 កែសម្រួលដោយ៖ ភារ៉ា

ប្រភព៖ nation thailand