សារព័ត៌មាន Sputnik បានផ្សាយថា កម្លាំងទាហានការពារដែនសមុទ្រចិន បានព្រមានដល់នាវាចម្បំាងអាមេរិក បំពាក់មីស៊ីល ចូលក្បែរប្រជុំកោះ ដែលមានវិវាទនៅសមុទ្រចិនខាងត្បូង ។ កម្លាំងទាហានជើងទឹកចិនចាត់ទុកនាវាអាមេរិកពីរគ្រឿងបំពានដែនអធិបតេយ្យរបស់ចិន ។

អ្នកនាំពាក្យក្រសួងការបរទេសចិន លោក Lu Kang បានបញ្ជាក់ថា « សកម្មភាពរបស់នាវាពិឃាតអាមេរិកគឺជាទង្វើរំលោភលើអធិបតេយ្យភាពរបស់ចិន ព្រមទាំងគំរាមកំហែង ដល់សន្តិភាព និងសន្តិសុខក្នុងតំបន់...ហើយយើងថ្កោលទោសយ៉ាងខ្លាំងចំពោះសកម្មភាពបែបនេះ» ។

ប្រតិកម្មរបស់ទីក្រុងប៉េកាំង កើតមានឡើងក្រោយ សហរដ្ឋអាមេរិកបានអះអាងថានាវាពិឃាតបំពាក់ មីស៊ីល Preble បានធ្វើដំណើរទៅក្បែរតំបន់ទីប្រជុំកោះ Scarborough ក្នុងតំបន់សមុទ្រចិនខាងត្បូង ហើយនេះក៏ជាលើកទី២ផងដែរដែលនាវាចម្បាំងអាមេរិកមានវត្តមាននៅក្បែរតំបន់ជម្លោះមួយនេះ ក្នុងរយៈពេលជាងមួយខែមកនេះ៕