ប្រធានក្លឹប Derby County លោក Mel Morris បានចេញមុខបញ្ជាក់អំពីអនាគតរបស់អ្នកចាត់ការទូទៅក្លឹបលោក Frank Lampard ថាមិនទាន់ទៅណានោះទេ ពោលគឺនៅបន្តការដឹកនាំនៅទីនេះទៀត ខណៈមួយរយៈចុងក្រោយនេះលេចលឺនូវព័ត៌មានជាច្រើនថារូបគាត់នឹងត្រឡប់ទៅដឹកនាំនៅ Chelsea វិញនោះ។

លោក Mel Morris បានលើកឡើងថា ពួកយើងបានមិនដែលបានពិភាក្សាអំពីរឿងនេះទេ។ ខ្ញុំដឹងថាមួយរយៈចុងក្រោយនេះលឺនូវព័ត៌មាន និងអ្នកគាំទ្រជាច្រើនចង់ឃើញ Frank Lampard ទៅដឹកនាំនៅ Chelsea ហើយរឿងនេះប្រាកដណាស់ ពិតជាអាចកើតឡើងបាននៅពេលណាមួយមិនខាន ប៉ុន្តែមិនមែនឥឡូវនេះទេ ស្របពេលកិច្ចសន្យារវាងក្លឹបនិងរូបគាត់ក៏នៅសល់២ឆ្នាំទៀត។

គួរបញ្ជាក់ថា Frank Lampard បានចូលកាន់តំណែងលើកដំបូងក្នុងអាជីពជាគ្រូបង្វឹករបស់ក្លឹប Derby County ក្រោយពីប្រកាសចូលនិវត្តន៍ និងបានបង្កការភ្ញាក់ផ្អើលដោយដឹកនាំក្រុមនេះឲ្យឡើងដល់វគ្គផ្តាច់ព្រ័ត្រដណ្តើមកៅអីឡើងមកក្របខណ្ឌ Premier League ប៉ុន្តែខកខានឳកាសទៅវិញក្រោយចាញ់ Aston Villa ក្នុងលទ្ធផល ២ទល់១៕