រាជធានីភ្នំពេញ៖ ក្នុងឱកាសសន្និសិទ្ធិសារព័ត៌មាន ស្តីពី «ព័ត៌មានក្លែងក្លាយ អន្តរាយសន្តិសុខជាតិ» ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល នៅក្នុងទីស្ដីការគណៈរដ្ឋមន្ត្រី នាព្រឹកថ្ងៃទី២៥ ខែកក្កដា ឆ្នាំ២០១៩ លោក ឈុំ សុជាតិ តំណាងក្រសួងការពារជាតិ បានលើកឡើងថា ក្រសួងការពារជាតិបដិសេដយ៉ាងដាច់ខាត ចំពោះសារព័ត៌មានមួយចំនួនដែលផ្សព្វផ្សាយថា កម្ពុជាចុះកិច្ចព្រមព្រៀងឲ្យកងទ័ពប្រទេសចិនប្រើប្រាស់មូលដ្ឋានជើងទឹករាមផ្ដាច់មុខ។ 

លោកថា ការចុះផ្សាយទាំងនេះ បានធ្វើឲ្យមានបញ្ហាដល់សន្តិសុខជាតិ ក៏ដូចជានាំឲ្យមានការភ័ន្តច្រឡំដល់សាធារណៈ និងក្នុងន័យញុះញង់ បំភ័ន្តការពិតដល់ពលរដ្ឋ ហើយចាត់ទុកថា ការចុះផ្សាយនេះជាចេតនាដ៏អាក្រក់បំផុតប្រឆាំងជាមួយកម្ពុជា។ លោកបានបញ្ជាក់បន្ថែមផងដែរថា កម្ពុជាមិនត្រូវការកម្លាំងយោធាបរទេសណានោះទេ លោកថាកម្ពុជាមានសមត្ថភាពគ្រប់គ្រាន់ក្នុងកិច្ចការពារសុវត្ថិភាពខ្លួនឯង ដោយពុំចាំបាច់ពឹងផ្អែកកម្លាំងយោធាប្រទេសណាម្នាក់ឡើយ។

គួរបញ្ជាក់ដែរថា កាលពីដើមសប្តាហ៍នេះ សារព័ត៌មាន The Wall Street Journal របស់សហរដ្ឋអាមេរិកបានចុះផ្សាយព័ត៌មានមួយ ដោយធ្វើការចោទប្រកាន់មកលើប្រទេសកម្ពុជា ថាបានចុះកិច្ចព្រមព្រៀងដោយសម្ងាត់ អនុញ្ញាតឲ្យយោធានៃប្រទេសចិនប្រើប្រាស់ដោយផ្ដាច់មុខនូវមូលដ្ឋានកងទ័ពជើងទឹករាម ក្នុងខេត្តព្រះសីហនុ។ 

យ៉ាងណាក៏ដោយ ព័ត៌មាននេះត្រូវបានប្រមុខរាជរដ្ឋាភិបាលកម្ពុជា ឆ្លើយតបច្រានចោលយ៉ាងដាច់អហង្ការ ចំពោះព័ត៌មានដែលចេញផ្សាយនេះ ព្រមទាំងចាត់ទុកថា ការចុះផ្សាយនេះជាចេតនាដ៏អាក្រក់បំផុតប្រឆាំងជាមួយប្រទេសកម្ពុជា៕ កែវ ពុម្ពសែន