កីឡាករ Paulo Dybala បានបង្ហើបប្រាប់ថា ខ្លួនមិនចង់ចាកចេញពីក្លឹប Juventus នៅរដូវក្តៅនេះទេ បើទោះបីជាមានការចាប់អារម្មណ៍ពីក្លឹបផ្សេង និងខណ:ដែលខ្សែប្រយុទ្ធសញ្ជាតិអាហ្សង់ទីនរូបនេះអាចត្រូវបានប្រើប្រាស់ជាផ្នែកនៃការដោះដូរយកខ្សែប្រយុទ្ធ Romelu Lukaku ជាមួយក្លឹប Man Utd ។

អ្នកចាត់ការក្លឹប Juventus លោក Maurizio Sarri មិនចាត់ទុកខ្សែប្រយុទ្ធ​ Dybala ជាផ្នែកសំខាន់នៃផែនការរបស់លោកទេ។ក្លឹប Tottenham ក៏ធ្លាប់បានទាក់ទងជាមួយក្លឹបយក្សអ៊ីតាលីផងដែរ ជុំវិញលទ្ធភាពផ្ទេរ​ Dybala នៅរដូវក្តៅនេះ ប៉ុន្តែតាមកាសែត Sky Sport Italia បានលើកឡើងថា Dybala ចង់បន្តនៅជាមួយក្លឹប Juventus និងប្រជែងយកកៅអីក្នុងក្រុមជម្រើស។Dybala អាចនឹងកាត់បន្ថយការពេលវេលាសម្រាករបស់ខ្លួន ដើម្បីព្យាយាមសម្របខ្លួនទៅនឹងទម្រង់លេងរបស់លោក Sarri។ កីឡាករវ័យ២៥ឆ្នាំរូបនេះគ្រោងនឹងវិលត្រឡប់មកក្លឹប Juventus វិញនៅថ្ងៃទី៥ខែសីហា ខណៈពេលទទួលបានពេលវេលាសម្រាកបន្ថែម បន្ទាប់ពីបង្ហាញមុខនៅក្របខណ្ឌ Copa America សម្រាប់ក្រុមជម្រើសជាតិអាហ្សង់ទីន៕